Алакөл шомылу маусымына дайын: Жағалауды енді дрондар бақылайды

Egemen.KZ парақшасындағы деректерге сәйкес, Qazaq24.com ақпарат таратты..

Алакөл жағалауында жазғы туристік маусымға дайындық қызу жүріп жатыр. Биыл өңірге 2 млн-ға жуық турист келеді деп күтіледі. Осыған байланысты жағалауды бекіту, кәріз жүйесін жаңарту, санитарлық тазалықты күшейту және қауіпсіздікті қамтамасыз ету бағытындағы жұмыстар атқарылып жатыр, деп хабарлайды Egemen.kz.

Фото: Ашық дереккөз

Соңғы жылдары қыс мезгіліндегі мұз массалары мен қатты желден көтерілген толқындар жағалауды шайып, демалыс орындарына қауіп төндірген. Осыған байланысты облыс әкімдігі Алакөл жағалауының 13 шақырым аумағын қамтитын қорғаныс жобасын қолға алды. Қазір Көктұма ауылында 960 метр, Ақши ауылында 200 метр жағалау бекітілген. Жоба толық аяқталған соң бұл аумақтар заманауи қоғамдық жағажайға айналады.

Инженерлік инфрақұрылым да кезең-кезеңімен жаңартылып келеді. Ақши ауылында 69 шақырым кәріз желісінің құрылысы толық аяқталған. Сонымен бірге Ақши мен Көктұма ауылдарынан шығатын ағын суларды қабылдап, тазартатын заманауи тазарту қондырғысы салынып жатыр. Нысанның қуаты тәулігіне 6500 текше метрді құрайды.

Жазғы маусымда Алакөлге қосымша пойыздар қатынайды

Биылғы маусымда туристердің жайлылығы үшін жағалауға қосымша 100 қоқыс контейнері, 40 киім ауыстыратын орын, 40 биодәретхана, 40 құтқару мұнарасы, 13 шақырым буй желісі және 8 пирс орнатылады. Сонымен қатар Бескөл мен Ақши ауылдары арасында 57 шақырым электр желісі мен 2 қосалқы станция іске қосылған.

Тазалық мәселесіне де ерекше көңіл бөлініп отыр. Осы мақсатта арнайы «Алакөл Тазалық» коммуналдық мемлекеттік мекемесі құрылып, оның материалдық-техникалық базасы 21 бірлік арнайы техникамен толықтырылған. Енді көл жағалауындағы қоқысты шығару, қоғамдық аумақтарды тазалау, жағажайларды күтіп ұстау және санитарлық бақылау жұмыстары тұрақты түрде жүргізіледі. Жағалауда маусымдық бригадалар күн сайын жұмыс істеп, контейнерлердің уақытылы босатылуы мен демалыс орындарының тазалығын қадағалайды.

Алакөл ауданының әкімі Алмас Абдиновтың айтуынша, туристер саны артқан сайын қызмет көрсету сапасы да жақсарып келеді.

«Алакөлге келетін туристердің саны артып жатқандықтан, біз жағалаудағы қызмет көрсету сапасын да үнемі жақсартып келеміз. Биыл “Алакөл Тазалық” мекемесі құрылып, тазалық жұмыстары бір жүйеге түсті. Жағалаудағы киім ауыстыратын дүнгіршектер саны көбейтілді. Қосымша санитарлық нысандар орнатылып жатыр. Ең бастысы – Алакөл жағалауы жыл сайын жаңарып, демалушыларға қолайлы әрі қауіпсіз аймаққа айналып келеді. Бұл жұмыстар алдағы уақытта да жалғасады», деді аудан әкімі.

Алакөлге жету де жеңілдеген. Жалпы ұзындығы 488 шақырым болатын Талдықорған – Үшарал және Үшарал – Достық автомобиль жолдары жаңғыртылып, көлік қатынасы жақсарған. Үшарал әуежайының ұшу-қону жолағы жөнделіп, ірі әуе кемелерін қабылдауға мүмкіндік жасалды. Сонымен қатар Астана, Алматы, Өскемен, Семей, Павлодар және Қызылорда қалаларынан Алакөл бағытына 12 пойыз қатынайды.

Алакөл мен Балқаш туризмі: Мемлекет басшысы Жетісу облысының әкіміне бірқатар тапсырма берді

Қауіпсіздік шаралары да күшейтілген. Ақши ауылындағы құтқару бөлімшесінде 13 құтқарушы мен 11 моторлы қайық тәулік бойы кезекшілік етеді. Жазғы маусымда көл жағалауында 50 полиция қызметкері жұмыс істейді. Қоғамдық тәртіп дрондар мен 39 бейнебақылау камерасы арқылы бақыланады. Ақши мен Көктұма ауылдарындағы дәрігерлік амбулаториялар тәулік бойы қызмет көрсетеді.

Қазір Алакөл жағалауында 277 туристік нысан жұмыс істейді. Тек 2025 жылдың өзінде 17 жаңа туристік нысан пайдалануға берілген.

Соңғы жаңалықтар