Әлемдік брендтер неліктен Ресейде тауар белгілерін қайта тіркей бастады

Роспатентке кімдер жүгінді

Америкалық технологиялық алпауыт Microsoft 2022 жылдың наурызында Ресей нарығынан кететінін жария етіп, бұл нарықта тауарлар сатуды және қызметтер көрсетуді тоқтатты. Алайда 2025 жылдың қазан айының басында корпорация Роспатентке тауар белгілерін тіркеуге өтінім берді. Тізімде мынадай тауар белгілері бар: Microsoft, Excel, Windows, Xbox, Bing, Azure, Visual Studio, Wasteland және State of Decay.

Сондай-ақ корпорация Microsoft 365 және Halo тауар белгілерін тіркеуге де өтінім беріп отыр.
Осы жылдың қыркүйегінде тағы бір америкалық компания — PepsiCo Mirinda логотипі мен атауын орыс тілінде тіркеуге екі өтінім берді.

Тамызда Ресей нарығынан кеткен оңтүстіккореялік Hyundai бренді тауар белгілерін тіркеуге алты өтінім жасады.

Қыркүйекте оның ізін ала неміс автоконцерні Mercedes-Benz-те ресейлік нарыққа кіруге өтінім берді.

Осы айда Роспатентке Vogue тауар белгісін тіркеуге өтінім келіп түсті. Өтінім беруші — Vogue, Glamour және GQ журналдарын шығаратын Condé Nast баспа үйі.

Жапондық Fast Retailing Co. холдингі (Uniqlo дүкендер желісін басқарады) 2025 жылдың 31 тамызында Роспатентке он жаңа тауар белгісін тіркеуге өтінім берді. Өтінімдердің ішінде GU, Fast Retailing Co. және Uniqlo логотиптері бар. Сонымен қатар холдинг Uniqlo және «Юникло» атауларын тіркеуді сұрап отыр.

Zara бренді де көк түсті жаңа логотипімен тауар белгісін тіркеуде. Өтінім 2025 жылдың 29 тамызында берілген, өтінім беруші — «Индустрия де Дисено» (компанияның испан тіліндегі атауы — Inditex).

2025 жылдың қазанында француз сән үйі Louis Vuitton Роспатентке үш өтінім берді. Олардың ішінде компания логотиптерінің әртүрлі нұсқалары бар. 2022 жылдың наурызында француздық LVMH (Louis Vuitton Moet Hennessy) холдингі Ресейден кететінін хабарлаған болатын. Содан кейін Sephora косметика дүкендері жабылған еді. 2022 жылдың 11 шілдесінде Sephora-ның ресейлік бөлімшесі сатылғаны жарияланды. 2022 жылдың 10 қазанында дүкендер бұрынғы ресейлік «Иль де Ботэ» брендімен қайта ашыла бастады. 2016 жылы LVMH сатып алған ресейлік желі осылай аталған-ды.

Кімдер тіркеліп үлгерді

2025 жылдың қыркүйегінде Warner Bros киностудиясын тіркеу туралы шешім қабылданды. Роспатентке тауар белгісін тіркеуге өтінім тамыз айында берілген. Компания Ресейде түрлі өнімдерді — фильмдер, сағаттар, ерлер мен әйелдер киімі, бейнеойындар, ас үй ыдыстары, ұялы телефондарға арналған аксессуарлар мен кеңсе тауарларын өндіруге және сатуға құқық алды. Сонымен қатар, зергерлік бұйымдар, ойыншықтар, қойындәптерлер мен бәліш қалыптары сынды түрлі тұрмыстық заттар тізімге енді.

Қазанда Роспатент Coco Chanel тауар белгісін (өтінім 2024 жылдың қарашасында Швейцариядан берілген) тіркеді. 2024 жылдың соңынан бері компания шамамен 26 тауар белгісін тіркеуге өтінім берген. Олардың қатарында — компания атауының орысша және ағылшынша нұсқалары, зергерлік бұйымдар топтамалары, иіс су мен косметика атаулары, сондай-ақ парфюмериялық бөтелкелердің сыртқы көрінісін тіркеуге арналған екі өтінім бар. Chanel бренді 2022 жылдың наурызында Ресейдегі жұмысын тоқтатқан еді. Екі жылдан кейін нарықтан толықтай кетіп, жалдау шарттарын бұзды және дүкендерін жапты.

Осы айда швейцариялық Rolex компаниясы бес тауар белгісін тіркеді. Олардың барлығы әртүрлі сағат түрлеріне қатысты. Тіркелген белгілер: Rolex President, Cerachrom, Oysterlock, Rolex Superlative және Rolex Glidelock.

Не үшін тіркеу қажет

Көптеген маманның пікірінше, шетелдік компаниялар өз брендтерін құқықтық қорғаудың мерзімінен бұрын тоқтатылуынан қорғау үшін тауар белгілерін тіркеуге жаңа өтінімдер беріп жатыр. Осылайша олар үш жыл бойы белгі қолданылмаған жағдайда күшін жоятын норманы «жоюға» тырысады. Мұндай әрекеттер құқықты теріс пайдалану ретінде бағалануы мүмкін. Алайда мұндай даулар күрделі әрі шығынды болып келеді. Сондықтан компаниялар дәл осы тәсілді қолдануды жалғастырып отыр.

Тауар белгісін тіркеу брендтерді көшірмеден қорғауға және танымалдылықты сақтауға мүмкіндік береді. Осылайша, компаниялар параллель импортпен күреске араласпай-ақ, тұтынушылар назарын ұстап тұра алады. Әдетте тіркеу үш айға дейін созылады. Бірақ егер өзгерістер аз болса, процесс тезірек аяқталуы мүмкін.