Әлеуметтік акцияға айналған марафон

Сурет: osdp.kz

Ұйымдастырушылар марафон арқылы азаматтарды саламатты өмір салтын ұстануға шақырумен қатар, зейнетақы жүйесін реформалау мәселесіне де қоғам назарын ауда­­руды мақ­­сат етті. Марафонға ЖСДП-дан Құрылтай депу­таттығына кандидаттар Мақсұт Насибулов, Ажар Сағандықова, Нұрлан Әуесбаев, Нұрлан Жабаев, Наурыз Сайлаубай, сондай-ақ партия белсенділері, жастар қанатының мүшелері, еріктілер мен елорданың белсенді зейнеткерлері қатысты. Әртүрлі буын өкілдерінің бір алаңда бас қосуы іс-шараның негізгі идеясын – ұрпақтар сабақтастығы мен қоғамдық бірлікті айқын көрсетті.

Қатысушылар скандинавиялық жүріс таяқ­та­рымен белгіленген қашықтықты еңсе­ріп, белсенді өмір салтын насихаттады. Соны­мен қатар марафонның басты ерекшелігі – ЖСДП-ның зейнет жасын кезең-кезеңімен төмендету жөніндегі бастамасын қолдау болды.

Партия белсенділері әйелдердің зейнетке шығу жасын 58-ге, ал ерлердің зейнетке шығу жасын 60 жасқа дейін төмендетуді ұсынды. Осы идеяны көрнекі түрде жеткізу мақсатында марафонға қатысушылар арнайы киімдеріне «58» және «60» сандарын орналастырып, марафон мәресіне бірге жетті. Іс-шара барысында тағы бір рәміздік мәнге ие жайт назар аудартты. ЖСДП сайлау бюллетенінде №2 болып тіркелгендіктен, қатысушылар бұл реттік санды да марафонның негізгі символдарының бірі ретінде пайдаланды.

Жалпы, партия бағдарламасында зейнетақы жүйесін түбегейлі жаңғырту мәселесіне ерекше көңіл бөлінген. Онда зейнет жасын төмендетумен қатар, зейнетақы төлемдерін отандық өмір сүру сапасының стандартына сәйкестендіру, сондай-ақ әрбір азаматтың қарттық шағын лайықты деңгейде қамтамасыз ету мемлекеттің тікелей міндеті екені көрсетілген.