Әлеуметтік мәселелер назарға алынды

Жиынға партия облыстық филиалының төрағасы Дауыл Бейсенқұлов, кеңес мүшелері мен әлеуметтік салаға жауапты мекеме басшылары қатысты. 

Кеңес отырысында өңірдегі әлеу­мет­тік саясаттың жүзеге асу барысы жан-жақты талқыланды. Облыстық жұмыспен қамтуды үйлестіру және әлеуметтік бағдарламалар басқар­масының басшысы Еркін Келесов Жол картасындағы әлеуметтік бағыттағы тармақтардың орындалу жайында баяндама жасап, нақты деректермен бөлісті.  

Партияның сайлауалды бағдарла­масына сәйкес, басқармаға 8 межелік көрсеткіш жүктелген болатын. Бүгінде оның төртеуі орындалған, қалғанының жыл соңына дейін жүзеге асуы күтілуде. Жыл басынан бері 1 903 жаңа жұмыс орны ашылып, 1 006 азаматқа қайтарым­сыз грант берілген. Сондай-ақ 13 мың­нан астам адам субсидияланатын жұмыс орындарына тартылған.

Жиында жастарды жұмыспен қамту мәселесі де көтерілді. Әсіресе, медицина саласы бойынша оқуын аяқтаған түлек­терді «Жастар практикасы» арқылы жұмысқа орналастырудың маңызды­лығы айтылды. Бұл бағытта қалалық Мансап орталығы мен Жамбыл медици­налық колледжі арасында нақты әріп­тестік орнату қажеттігі атап өтілді.

Сондай-ақ кеңес отырысында аудан­дарда отбасын қолдау орталық­тарын ашу мәселесі талқыланды. Бұл бағытта нақты жоспар жасақталған. Алдағы жылы «AMANAT» партиясының Сайлауалды бағдарламасы аясында Меркі және Сарысу аудандарында жаңа орталықтар ашылады. Бұл бастама – ауыл тұрғындарының әлеуметтік мәсе­лелерін шешуге, отбасылық институтты нығайтуға бағытталған маңызды қадам болмақ.

Кеңесте көтерілген тағы бір өзекті мәселе – зейнеткерлерді сауықтыру шара­лары. Қазір облыста 114 мыңнан астам зейнеткер тұрады. Оларды сауық­тыру орталықтарына жолдамамен жі­беру үшін бюджеттен қаржы қарас­тырылғанымен, қаражаттың мақсатты игерілмеуінен ол кері қайтарылып отыр. Сондықтан бұл мәселені тиімді шешу үшін жаңа жүйе қалыптастыру қажет.

Осы және өзге де әлеуметтік мәсе­лелер партия назарында. «AMANAT» партиясы халықтың өмір сапасын арт­тыруға, әлеуметтік сұраныстарға дер кезінде жауап беруге бағытталған жұ­мыстарды алдағы уақытта да жүйелі түрде жалғастыра береді.

Елнар ЕЛТАЙ