Алматы гастрономиялық саяхатқа арналған ең үздік қалалардың бірі деп аталды

Алматы америкалық Eater басылымының нұсқасы бойынша Where to Eat 2026 гастрономиялық бағыттар тізіміне енді. Қала гастрономия әуесқойлары баруы тиіс орындардың бірі ретінде аталды, - деп хабарлайды Tengri Travel.

Eater жарияланымында Қазақстанның ірі мегаполисі кейінгі жылдары өңірдің гастрономиялық картасындағы өз позициясын айтарлықтай нығайтқаны айтылған. Авторлар мейрамхана мәдениетінің дамуы, жаңа гастрономиялық жобалардың пайда болуы және шеф-аспаздардың жергілікті дәстүрлерді жаңғыртуға деген қызығушылығы арқасында Алматының Орталық Азиядағы басты кулинариялық орталықтардың біріне айналып келе жатқанын атап өтті.

"Қазақстанның ең ірі қаласы Алматының мейрамханалары оны тағам сүйер қауым үшін міндетті түрде баруы тиіс бағытқа айналдырып отыр", - делінген жарияланымда.

Instagram-дағы бұл жарияланымды көру

Eater (@eater) жариялаған жазба

Басылымның бағалауы бойынша, қаланың заманауи гастрономиялық сахнасы дәстүр мен жаңа тәсілдердің ұштасуына негізделген. Жергілікті асханада қазақтың көшпенділер дәстүрі ұйғыр, орыс, өзбек, корей, түрік және үнді кулинариялық ықпалдарымен астасып жатыр. Сонымен қатар, классикалық тағамдар қалалық гастрономияның маңызды бөлігі болып қала береді, ал заманауи орындар олардың жаңа интерпретацияларын ұсынады.

Eater соңғы бірнеше жылда Алматыда бүкіл Орталық Азияның шеф-аспаздарының басын қосқан алғашқы Almaty Food Fest өткеніне, сондай-ақ қаланың алғашқы ресми гастрономиялық гиді пайда болғанына ерекше назар аударды.

Жарияланым авторлары жергілікті мәдениеттің өзіндік ерекшеліктерінің бірі - ұзақ шай ішу дәстүрін де бөле жарып атап өтті.

"Қай жерде тамақтансаңыз да, дерлік әр үстелде шәйнек толы шай тұрады - көбіне қара шай, кейде жергілікті жемістер немесе дәмдеуіштер қосылады. Мұнда бір шыны шай үстінде бірнеше сағат өткізуге болады", - дейді материал авторы Джоанна Лобо.

Басылым туристерге палаудан міндетті түрде дәм татуды ұсынды және оны кез келген жерден кездестіруге болатынын атап өтті.

"Ең дәмді түрлері шырынды ет, тамаша карамельденген сәбіз, ал кейде қазымен бірге ұсынылады", - делінген жарияланымда.

Бұдан бөлек, Eater саяхатшылар үшін ұлттық тағамдарға мамандандырылған мейрамханалар желісінің жақсы дамығаны ұлттық асханамен танысуды жеңілдететінін айтады.

Eater мейрамхана мәдениеті мен гастрономияға арналған әлемдегі ең беделді медиалардың бірі болып саналады, ал оның жыл сайынғы Where to Eat тізімі гастрономиялық туризмге қызығатын аудиторияның назарын үнемі аударып отырады.

Google News арқылы жаңалықтарымызды қадағалаңыз