Алматы музейлері мәдени мұраны сақтаудың халықаралық стандартын енгізіп жатыр

Музей саласын дамыту және халықаралық стандарт енгізу аясында Алматы қаласы музейлері бірлестігінің қызметкерлері Корея Республикасының Сеул және Кёнджу қалаларының жетекші музейлерінде кәсіби біліктілігін арттырудан өтті. Бұл туралы Алматы қаласы Мәдениет басқармасының өкілдері мәлімдеді, – деп хабарлайды Aikyn.kz.

Біліктілікті арттыру бағдарламасы Сеул қаласы музейлері бірлестігі тарапынан тегін негізде жүзеге асырылып, мәдениет пен музей ісі саласындағы халықаралық ынтымақтастықты нығайту бағытындағы жүйелі жұмыстың нәтижесі болды.

Оқу бағдарламасы заманауи музей қызметінің негізгі бағыттары, атап айтқанда, экспонаттарды есепке алу және сақталуын қамтамасыз ету, оның ішінде қолайлы климаттық жағдайды (температура, ылғалдылық, жарық) бақылап, реттеу, реставрация және консервация жұмыстарын жүргізу, тасымалдау кезінде қауіпсіздік талаптарын сақталуын қадағалау бойынша теориялық және тәжірибелік сабақтарды қамтыды.

Тағылымдама аясында Музей қызметкерлері Сеул және Кенджу қалаларының жетекші музейлерінің жұмыс тәжірибесімен жан-жақты танысты. Атап айтқанда, Кореяның Ұлттық музейі, Корея Ұлттық фольклор музейі, Сеул қаласы тарихы музейі, Сеул қолөнер өнер музейі, Седжон патша музейі, Адмирал Ли Сунсин музейі, Кореяның Ұлттық сарай музейі, Кенджу Ұлттық музейі, Кенджу Ұлттық паркі, Кенбоккун сарайы, Чхонгечхон музейі, Ханяндосон бекініс-қамалы музейі.

Сонымен қатар, ЮНЕСКО-ның Әлемдік мұралар тізіміне енген ашық аспан астындағы Кенджу археологиялық кешенінің қызметімен танысып, озық тәжірибелерін зерделеді.

Айта кетейік, 2022 жылы Алматы қаласы музейлер бірлестігі мен Сеул қаласы тарихы музейі арасында ынтымақтастық туралы меморандумға қол қойылған болатын. Осы келісім аясында 2022 жылы Сеул қаласы тарихы музейінде Алматы музейінің «Ұлы Дала жауһарлары» көрмесі, ал 2024 жылы Алматы қаласында Сеул қаласы тарихы музейінің «Сеул ғажайыптары» көрмесі ұйымдастырылды.