Алматыда 40 қабатты кешеннің ендігі тағдыры не болмақ

RAMS Beyond деп аталатын 40 қабатты ғимараттың Тимирязев көшесі мен Сейфуллин даңғылының қиылысындағы құрылысына қатысты халық арасында көп пікір айтылды. Редакция бұл нысан бойынша жағдайды нақтылау үшін Индустрия және құрылыс министрлігіне ресми сауал жолдады.

Кімдер жазаланды

Вице-министр Қуандық Қажкеновтің айтуынша, «Коммерциялық және жерасты автотұрағы бар көпфункционалды ғимарат (ЖК Beyond)» жобасының тапсырыс берушісі әрі жер учаскесінің иесі — «BR Construction Qazaqstan» ЖШС.

Қала әкімдігі жер иесіне қатысты Әкімшілік құқық бұзу туралы кодекстің 316-бабының 1-бөлігі мен 321-бабы бойынша әкімшілік шаралар қабылдап, анықталған заң бұзуды жою үшін құрылыс жұмыстарын тоқтата тұру туралы нұсқама берген.

— Бүгінгі таңда анықталған заң бұзуды жою туралы нұсқамаға сәйкес құрылыс тоқтатылған, — деді вице-министр.

Жобаның ендігі тағдыры не болмақ

Қуандық Қажкеновтің айтуынша, салалық заңнамаға сәйкес елді мекен аумақтарын дамыту, оның ішінде құрылысқа рұқсат беру мәселелері жергілікті атқарушы органдардың құзыретінде.

— Бұл нысан бойынша қала әкімдігі сәулет-жоспарлау тапсырмасын және келісілген эскиздік жобаны берген. Құрылыс қазіргі таңда тоқтатылған. Осы жылдың төртінші тоқсанында министрлік жоспарлы тексеріс жүргізуді жоспарлап отыр. Тексеру барысында рұқсат құжаттарының заңды не заңсыз екені қаралады. Егер заң бұзу анықталса, тиісті шаралар қабылданады, — деді вице-министр.

Министрлік өкілі бұл жоба бойынша сот ісі жүріп жатпағанын айтты.

Әкімдік не дейді

Жуырда Алматы әкімі Дархан Сатыбалды 40 қабатты ғимаратқа қатысты депутаттық сауалға жауап беріп, қала құрылысы бақылау басқармасы тарапынан құрылыс компаниясына қатысты жоспардан тыс тексеру жүргізілгенін мәлімдеді.

Нәтижесінде, құрылыс компаниясы сәулет-жоспарлау тапсырмасын алып, эскиздік жобаны келісуден өткізгені анықталған. Сондай-ақ, қазіргі таңда құрылыс жұмыстары уақытша тоқтатылған. Бұл аумақта сквер немесе әлеуметтік нысан салу жоспарланбаған.

Бұған дейін әкімдік Абай даңғылының оңтүстігінде, әл-Фараби даңғылының солтүстігінде, Яссауи көшесінің шығысында және Үлкен айналма жолдың батысында тоғыз қабаттан биік көпфункционалды ғимараттарды салуға тек олардың қоғамдық маңызы дәлелденген жағдайда және барлық талап сақталған кезде ғана рұқсат берілетінін хабарлады.

Еске салайық, тамыздың соңында Алматыда қоғамда үлкен дау тудырған 40 қабатты RAMS Beyond кешенінің құрылысы уақытша тоқтатылған еді.