Алматыда алаяқтар әжесі мен neмересін далада қалдырды: қазір олардың жағдайы қалай

Алматыда 12 жасар қыз бен оның 75 жастағы әжесі алаяқтардың арбауына түсіп, жалғыз баспанасынан айырылып қалды. Олардың қазіргі жағдайы туралы Балалардың құқықтарын қорғау басқармасының өкілдері айтып берді, деп хабарлайды Tengrinews.kz.

"Прокуратура бақылауға алды"

Маусымда әлеуметтік желілерде Алматының 75 жастағы тұрғыны мен оның 12 жасар немересі далада қалғаны туралы видео тараған болатын.

Қоғамдық резонанстан кейін жағдайға балалар омбудсмені Динара Зәкиева, Алматы прокуратурасы және Балалардың құқықтарын қорғау басқармасы араласты. Сол кезде отбасы дағдарыс орталығына орналастырылғаны, ал прокуратура істі бақылауға алғаны белгілі болды. Сондай-ақ полиция алаяқтық дерегі бойынша сотқа дейінгі тергеу амалдары жүргізіліп жатқанын растады.

Алматы қалалық балалардың құқықтарын қорғау басқармасы үйден шығарылғаннан кейін отбасына жедел көмек көрсетілгенін хабарлады. Олар алдымен "Ана үйі" жекеменшік дағдарыс орталығына орналастырылып, кейін сот процесі аяқталғанша тұратын басқа жекеменшік дағдарыс орталығына ауыстырылды.

Ведомство мәліметінше, отбасына психологиялық және заңгерлік көмек көрсетіліп, әрі қарай әлеуметтік сүйемелдеумен қамтамасыз етілген. Жағдай әлі де басқарма бақылауында.

Сондай-ақ басқарма тергеудің мән-жайын ашты. Мекеме мәліметінше, 2025 жылғы 9 қаңтарда белгісіз адамдар әйелді алдап, сеніміне қиянат жасау арқылы оны нотариусқа баруға, пәтерін қайта рәсімдеуге және ақшаны үшінші тұлғаға беруге көндірген.

2025 жылғы 13 ақпанда жәбірленушінің арызы бойынша Бостандық аудандық полиция басқармасы сотқа дейінгі тергеп-тексеруді бастады.

Тергеу барысында тергеуші пәтерді заттай дәлел ретінде танып, сот оған тиым салды. 2026 жылғы 28 ақпанда қылмыс жасаған адамдарды анықтау мүмкін болмағандықтан, сотқа дейінгі тергеу тоқтатылды. Бұл ретте пәтерден тыйым алынған жоқ. Соған қарамастан, 2026 жылғы 9 маусымда атқарушылық іс жүргізу аясында 75 жастағы зейнеткер, оның 12 жасар немересі және отбасының басқа да мүшелері үйден шығарылды.

Алматы қалалық балалардың құқықтарын қорғау басқармасы бала құқығының бұзылуы туралы хабарлау немесе көмек сұрау үшін 111 нөмірі бойынша бірыңғай байланыс орталығына жүгінуге болатынын еске салды.

Сонымен қатар өтініштер балалардың құқықтарын қорғау басқармасының Instagram және Facebook желілеріндегі ресми парақшалары, ведомствоның ресми сайты арқылы қабылданады. Мамандармен келесі телефон нөмірлері бойынша да байланысуға болады: 8 (777) 082-26-71 және 8 (707) 430-23-08.

Ведомство мәліметінше, дабыл түскеннен кейін жағдайды зерттейтін және ведомствоаралық сүйемелдеуді ұйымдастыратын кейс-менеджер тағайындалады. Мамандар оқиға орнына барып, мән-жайды анықтайды және басқа да мемлекеттік органдармен бірлесіп, бала мен отбасына көмек көрсету алгоритмін әзірлейді.

Бұған дейін Ақтауда зейнеткерлер отбасы жалғыз баспанасынан айырылып қалған еді - есептегіштерді тексеру туралы қарапайым телефон қоңырауы үш бөлмелі пәтерді сатумен және түскен барлық ақшаны алаяқтарға аударумен аяқталған. Зейнеткерлердің туыстары азаматтық сотта мәмілені жарамсыз деп тануға қол жеткізуге ниетті екені хабарланды.

Google News арқылы жаңалықтарымызды қадағалаңыз