Атыраудағы итке жасалған қатыгездік: қазір иттің жағдайы қалай және иесі қалай жазаланды

Атырауда иттің сұмдық кадрлары әлеуметтік желілерді тарап кетті. Tengrinews.kz тілшісі жануарды өз қамқорлығына алған еріктімен сөйлесті.

Атырауда иттің сұмдық кадрлары әлеуметтік желілерді тарап кетті. Tengrinews.kz тілшісі жануарды өз қамқорлығына алған еріктімен сөйлесті.

"Мысық үшін кек алған"

Қорлық көрген итті атыраулық ерікті әрі жаттықтырушы Мамочур Канович асырап алды. Оның айтуынша, 1 сәуірге қараған түні оған дабыл түскен. Ол оқиға орнына жеткенде, көршілері жануарды алып кеткен екен - болған жағдайдан кейін иесі қан-жоса болған итті оларға бере салған.

"Ит аяусыз соққыға жығылған: тұмсығы тілінген, гематомалар бар, арқа тұсынан соққы іздер көрініп тұр. Оны күрекпен ұрған, мұның ізі қалары анық. Ит қатты күйзеліске түскен, жасқаншақ болып қалған, басында агрессия көрсетті. Бұл түсінікті де, өйткені ол өмірінде таяқ пен соққыдан басқа ештеңе көрмеген. Мен итті көршілерінен алып, үйіме әкелдім, алғашқы көмек көрсеттім. Маған түсетін басқа да жануарлар сияқты өзімде қалдырдым", - дейді ерікті.

Жануар толық айыққан соң, оған жаңа мейірімді отбасы іздестіріледі.

Мамочур Кановичтің айтуынша, осыған дейін иттің иесі бірнеше рет ауысқан. Мұндай жағдайға иттің мысыққа тиіскені себеп болуы мүмкін. Ол әйелдің жануардан осылайша "кек алуды" ұйғарғанын нақтылады.

"Қаншама оқиға кадр сыртында қалады?"

Мамочур Канович мұндай жағдайлар өңір мен ел үшін таңсық емес екенін мойындайды. Оның жұмыс күні 3-4 шақыртудан басталады және ол күн сайын дерлік жарақат алған жануарларды қамқорлығына алады.

"Бұл тек камераға түсіп қалғандары ғана. Ал кадр сыртында қаншама оқиға қалып жатқанын елестетіп көріңізші. Жолда қалған, көлік қаққан иттер, тұмсығы сыммен байланып, далада қалған жануарлар - мұндай жағдайлар, өкінішке қарай, аз емес. 2005 жылдан бастап жаттықтырумен айналыстым, сонымен қатар көшеден жарақат алған жануарларды жинап жүрдім. Оларды емдеп, сосын жақсы қолға тапсыратынмын. Басында тек анда-санда көмектесетінмін, бірақ кейін бұл іске біржола бет бұрдым. Бүгінде жануарларды құтқару - менің өмірімнің 90 пайызы", – дейді ерікті.

Мамочурдың айтуынша, мүгедек болған иттерді бағып-қағу және емдеу қаржылай ғана емес, моральдық тұрғыдан да өте ауыр.

"Үйдегі отбасым менің бұл ісімді қолдайтындықтан, маған біршама жеңілдеу", – деп қосты ол.

Полиция не дейді?

Атырау облыстық Полиция департаменті 39 жастағы әйелдің ұсталғанын хабарлады. Оған қатысты жануарларға қатыгездік көрсету дерегі бойынша қылмыстық іс қозғалған. Полиция әйелдің кәмелетке толмаған баласы болуына байланысты оның уақытша ұстау изоляторына қамамағанын айтты.

Сондай-ақ ПД-дағылар қызметкерлер келген кезде әйелдің белсенді қарсылық көрсеткенін, сол үшін оған ӘҚБтК-нің 667-бабы - "Құқық қорғау органы қызметкерінің заңды талабына бағынбау" бойынша әкімшілік хаттама толтырылғанын қосып өтті.

"Бағынбағаны" үшін 90 мың теңге айыппұл

Атырау облыстық сотының баспасөз қызметі полиция қызметкеріне құрметсіздік көрсеткені үшін әйелге 30 АЕК (129 750 теңге) көлемінде айыппұл салынғанын хабарлады.

Бұл ретте сот оның материалдық жағдайы мен кәмелетке толмаған баласының барын ескеріп, айыппұл сомасын 30 пайызға, яғни 90 825 теңгеге дейін төмендетті.

"Сот 2026 жылғы 31 наурызда азаматша Л.-ның мас күйінде полиция қызметкеріне былапыт сөйлеп, құрметсіздік танытқанын анықтады. Л.-ның кінәсі әкімшілік құқық бұзушылық туралы хаттамамен, жауап алу хаттамасымен және бейнежазбамен толық дәлелденді", – деп хабарлады Атырау қалалық әкімшілік құқық бұзушылықтар жөніндегі мамандандырылған соты.

Сот қаулысы заңды күшіне енген жоқ.

Ал жануарға қатыгездік көрсету туралы іс әзірге сотқа түскен жоқ. Полиция қазіргі уақытта тергеу амалдары жүріп жатқанын нақтылады.

Қатыгездік үшін қандай жаза қарастырылған?

Адвокат Абзал Қасымжанов мұндай істердің соңы немен аяқталатынын түсіндірді.

"Қылмыстық кодекс жануарларға қатыгездік көрсетуді тікелей қылмыстық құқық бұзушылыққа жатқызады. Қазіргі уақытта заң бұл құқық бұзушылық үшін бір жылға дейін бас бостандығынан айыру түріндегі ең жоғары жазаны қарастырады. Жазаның нақты түрі іс мән-жайына және қатыгездіктің жануардың мертігуіне немесе өліміне әкеп соқтырғанына байланысты болады", – дейді адвокат.

Сондай-ақ адвокат кінәлілерді жауапқа тартуда қоғамдық қырағылықтың шешуші рөл атқаратынын атап өтті.

"Азаматтар мұндай жағдайға куә болса, кейін құқық қорғау органдарына жүгіну үшін жануарларға қатыгездік көрсету фактілерін фото және бейнежазбаға түсіріп алуы қажет", – деп толықтырды ол.

Ол сонымен қатар заңнамаға сәйкес мынадай жазалар барын еске салды:

Жануардың мертігуіне әкеп соққан қатыгездік үшін (316-баптың 1-бөлігі) 120 АЕК-ке дейін (2026 жылға 529 мың теңге) айыппұл, 120 сағатқа дейін қоғамдық жұмыстар немесе 30 тәулікке дейін қамауға алу қарастырылған. Өлімге әкеп соққан қатыгездік танытқаны үшін (2-бөлім): 200 АЕК-ке (865 мың теңге) дейінгі мөлшерде айыппұл, 200 сағатқа дейінгі қоғамдық жұмыстар немесе 50 тәулікке дейінгі мерзімге қамауға алу. Ауырлататын мән-жайлар болған кезде (3-бөлім), мысалы, егер іс-әрекет жария түрде, онлайн-платформаларды пайдалану арқылы жасалса немесе бірнеше жануарға қатысты болса, айыппұл 1000 АЕК-ке (4,3 миллион теңгеден астам) дейін артады, сондай-ақ бір жылға дейінгі мерзімге бас бостандығын шектеу немесе одан айыру жазасы қолданылуы мүмкін.

Следите за нашими новостями в Google News

Подписаться