Алматыда көлік өртеніп, ұзын сонар кептеліс пайда болды

Алматыда сағат 07:00 шамасында әл-Фараби даңғылы мен Жароков көшесінің маңында үш көлік қатысқан ірі жол апаты болды. Әлеуметтік желілерде оқиға орнынан түсірілген бейнежазбалар жарияланып, жүргізушілер қозғалыстың толық тоқтап қалғанын айтып шағымданған, деп хабарлайды Egemen.kz.

Фото: Видеодан алынған кадр

Қалалық полиция департаментінің алдын ала мәліметінше, батыс бағытта келе жатқан Toyota жүргізушісі қарсы жолаққа шығып кетіп, шығысқа қарай қозғалған Lexus автокөлігімен бетпе-бет соқтығысқан. Соққыдан кейін тоқтап тұрған Lexus-қа әл-Фараби даңғылы бойымен шығысқа қарай келе жатқан Hyundai көлігі соғылған. Қатты соққы салдарынан Toyota көлігі өртеніп, жүргізуші мен жолаушысы, сондай-ақ Lexus жүргізушісі жарақат алды.

Қазір Бостандық аудандық полиция бөлімінің қызметкерлері оқиғаның толық мән-жайын анықтап жатыр.

Төтенше жағдайлар департаментінің хабарлауынша, өрт сөндірушілер оқиға орнына дәл сол уақытта жетіп, Toyota Sienna маркалы көліктегі өртті 07:11-де толық сөндірген.

Бұған дейін Алматы облысында болған жол апатынан алты адам қаза тапты.