Алматыда қаланың меншігіне қайтарылған нысандар қандай мақсатта қолданылып жүр

Алматы қаласы мемлекеттік активтер басқармасының мәліметіне сәйкес, 2023 жылдан бері сот арқылы 3 нысан мегаполис меншігіне берілген. Олардың бірі — Алматы әуежайындағы коммерциялық орындар.

2023 жылы әуежайдың ішкі терминалында 30 коммерциялық үй-жай Алматы қалалық сотының азаматтық істер жөніндегі сот алқасының қаулысымен қаланың коммуналдық меншігіне қабылданған.

— Электрондық сауда-саттық нәтижелеріне сәйкес, 2024 жылдың 14 мамырынан бастап әуежайдың үй-жайлары кейіннен сатып алу құқығынсыз 30 жыл мерзімге «Алматы халықаралық әуежайы» АҚ-на сенімгерлік басқаруға берілді. Сенімгерлік басқарушы әуежай аумағында қызметтер көрсетуге қол жеткізу қағидаларына сәйкес үй-жайларды жалға беруге міндетті. Сондай-ақ жыл сайын объектіні сенімгерлік басқарудың таза табысы бөлігінен жергілікті бюджетке кемінде 200 млн теңге аударуға міндетті, — деп хабарлады ведомство.

Келесі нысан — Алмалы ауданы, Райымбек даңғылы, 196 үй мекенжайы бойынша орналасқан жылжымайтын мүлік объектісі (жалпы ауданы 3974 шаршы метр). Ол Алматы қаласының мамандандырылған ауданаралық экономикалық сотының 2023 жылғы 27 қарашадағы шешімі және қала әкімдігінің 2024 жылғы 25 сәуірдегі № 2/275 қаулысы негізінде Алматы қаласының коммуналдық меншігіне қабылданды.

— Қазіргі уақытта аталған жылжымайтын мүлік объектісі Алматы қаласы қоғамдық денсаулық сақтау басқармасының «Медициналық жедел жәрдем қызметіне» берілді, — деп хабарлады басқарма.

Одан бөлек Жетісу ауданы, Москвин көшесі, 41А үй мекенжайында орналасқан жылжымайтын мүлік объектілері (әкімшілік ғимарат, өндірістік ғимарат және қойма) Алматы қаласының коммуналдық меншігіне қабылданған. Ведомство мәліметінше, қазіргі уақытта аталған объектілерді сенімгерлік басқаруға беру мақсатында Алматы қаласының тиісті қаулысын қабылдау жоспарланған.

— Тиісті шешімдер қабылданғаннан кейін, объектілерді кейіннен сатып алу құқығынсыз бәсекелестік ортаға сенімгерлік басқаруға беру үшін электрондық сауда-саттық өткізілетін болады, — делінген жауапта.

Еске салайық, 2023 жылы Қайрат Боранбаевқа тиесілі болған «Алмалы» сауда орталығы да мемлекетке берілді. Қазір онда балаларға арналған алғашқы Ғылым музейінің құрылыс жүріп жатыр. Нысанды 2026 жылдың жазында ашу жоспарланып отыр.