Алматыда Шора Сарыбаевтың 100 жылдығына арналған жиын өтті

Алматыда тіл білімі мен түркологияның тағдырлы тақырыптары талқыланған халықаралық конгресс өтті.

Жиын қазақ тіл ғылымының темірқазығы, академик Шора Шамғалиұлы Сарыбаевтың 100 жылдығына арналды. Ғалымның тіл ғылымына сіңірген еңбегі - ұлт руханиятының мәңгілік ізі. Жиында академиктің шығармашылығына арналған кітап көпшілікке таныстырылды.

Шора Шамғалиұлы ана тіліміздің өткені мен бүгінгісін мұқият зерттеп, қазақ тіл білімі ғылымының дамауына сүбелі үлес қосқан тұлға. Конгресс аясында академиктің ғылыми мұрасынан бастау алатын қазақ тіл білімі мен түркітанудың жаңа парадигмалары сөз болды. Шора Сарыбаев салған сара жол бүгінде талай жас ғалымның ізденісіне бағыт-бағдар болып отыр. Оның ғылымға деген адалдығы өз алдына бір төбе.

Жеңісбек Төлен, ҚР Президенті жанындағы ҰҒА Білім және қоғамды дамыту орталығының басшысы:

- Бұл шараға Қазақстаннан ғана емес, бүкіл түркі елдерінен, оның ішінде Түркия, Әзербайжан, Өзбекстан, Қырғызстан басқа да мемлекеттерден ғалымдар келіп қатысуда. Ғалымдардың жастарға үлгі болуына, жастарға ғылымды насихаттауына, жастардың ғылымға келуіне түрткі болатын осындай академиктерді әрдайым қолдауға дайын екендігін айтуға болады.

Ғалымның шәкірттері ұстаздың еңбегін ұлықтап, түркологиядағы тың жаңалықтарын жаңа буынға жеткізуді парыз санайды. Қазақ тілінің диалектілік байлығын зерттеп, әр өңірдің сөз қорын ұлт әдебиетінің алтын арқауына айналдырған ғалымның көзқарасы бүгінде де өзекті. Конгресс аясында Шора Сарыбаевтың жеке шығармашылығына арналған 6 бірдей кітап көпшілікке таныстырылды. Соның бірі - «Ғалым. Ғылым. Ғибрат» атты жинақта академиктің бұрын жарық көрмеген қырыққа жуық ғылыми мақаласы мен өмір жолын бейнелейтін жазбалары топтастырылған.

Кәрімбек Құрманәлиев, ҚР Президенті жанындағы ҰҒА академигі:

- Бұл кісінің 300-ден аса ғылыми еңбектері, оның ішінде 20-дан астам монография мен оқулықтарының бәрін айтпағанның өзінде, Түркі әлеміне түрен салған бұл қазақ түркология лексикографиясының негізін салған адам.  Бұл тек қана біздің Қазақстанда емес, біздің елімізде емес бүкіл Түркі әлемі Шора Сарыбаевтың атын біледі. Мен осындай үлкен ғалымның, көрнекті ғалымның шәкірті болғаныма мақтан етемін.

Академиктің 100 жылдығына арналған жиында Мемлекет басшысы Қасым-Жомарт Тоқаевтың құттықтау хатын Ғылым және жоғары білім министрі Саясат Нұрбек жеткізді. Конгресте Шора Сарыбаев мұрасын талдаудан өзге, Қазақ тілінің ұлттық корпусын әзірлеу, оқулылақтар жазу және әдістемелерді жетілдіру туралы да баяндамалар жасалды.

Авторлары: Алуа Ералықызы, Радик Джакупов