Алматыда жас бағдарламашылар жарысы басталды

Жас бағдарламашылар мен шығармашыл студенттер Алматыдағы хакатонда бас қосты, деп хабарлайды 24KZ. Биылғы дода «AI және жұмысшы мамандықтар» тақырыбына арналды.

Қазақ ұлттық қыздар педагогикалық университетінде ұйымдастырылған байқауға 20-дан аса команда қатысты. Олар 24 сағат ішінде инновациялық бағдарламалық шешімдер әзірлеуі тиіс. Студенттердің жұмысын білікті мамандар бағалайды. Қиын мәселені, оңай әдіспен шешкен топқа басымдық беріледі. Айта кетерлігі, қыздар педагогикалық университеті жасанды интеллект, цифрлық педагогика, IT және EdTech бағытында маңызды жобаларды жүзеге асырып келеді. Бірнеше инновациялық зертхана ашылды. 

Еркін Жұманқұлова, Қазақ ұлттық қыздар педагогикалық университеті проректорының м.а.:

- Қазір жасанды интеллект дәуірінде өмір сүріп жатырмыз. Біздің университет болашақ мұғалімдерді оқытады. Мектепке баратын жас ұстаз заман көшінен қалмай цифрлық технологияларды меңгеруі тиіс деп есептеймін.

Әзиз Қажденбек, Жастар саясаты басқармасының басшысы:

- Бұл біз үшін, Алматы қаласы үшін өте ерекше. Президентіміздің қолдауымен Алматы қаласы Түркі әлемінің жастар астанасы атанған болатын. Соның аясында түркі университеттерінің жастарымен тәжірибие алмасып идеялар ойлап табу біз үшін өзекті.