Алматылық келіншек TikTok қа ролик түсіріп, сотқа тартылды

Алматы тұрғыны TikTok желісіне айырым белгілері мен нышандары бар қызметтік киіммен видео түсірген. Бұл видеоны полицейлер байқап қалып, оған қатысты әкімшілік хаттама толтырды. Іс сотқа дейін жетті. Толығырақ Tengrinews.kz материалында.

Алматы тұрғыны не үшін жазаланды?

Іс материалдарында 2026 жылдың 4 қаңтарында Алматы тұрғыны полиция, әскери немесе арнайы қызмет қызметкері болмаса да, айырым белгілері мен нышандары бар қызметтік киім кигені айтылған.

"Алматыда заңсыз түрде формалық киім-кешек пен айырым белгілері және нышандары бар арнайы киім киіп, бейнеролик түсіріп, оны TikTok әлеуметтік желісінде жариялаған", – делінген құжатта.

Бұл әрекеті үшін оған қатысты ӘҚБтК-нің 675-бабы 1-бөлігі ("Әскери киім нысанының және (немесе) айырым белгілері мен нышандары бар нысанды киім мен арнайы киім-кешекті заңсыз киіп жүру") бойынша әкімшілік хаттама толтырылды.

Сотта қыз кінәсін мойындап, өкінетінін айтты. Іс WhatsApp арқылы қаралды.

Сот хаттаманы, қыздың түсініктемесін, полицейдің баянатын, киімді тәркілеу актісін, TikTok-тағы видео мен суреттерді зерттеді. Бұл материалдар құқықбұзушылық фактісін растады.

Заң бойынша әскери немесе нысанды киімді заңсыз киіп жүргені үшін жеке тұлғаға нысанды киімі тәркілене отырып, 5 АЕК мөлшерінде айыппұл салынады. Сот қыздың әрекеті ӘҚБтК-нің 675-бабы 1-бөлігі бойынша дұрыс сараланған деп таныды.

"Өз әрекетімен қыз Қазақстан Республикасында нысанды киім мен арнайы киім-кешекті киіп жүру ережелерін бұзды", – деп түсіндірді соттағылар.

Нәтижесінде қыздың нысанды киімі тәркіленіп, айыппұл салынды.

"ӘҚБтК-нің 675-бабының 1-бөлігінде көзделген әкімшілік құқық бұзушылықты жасағаны үшін кінәлі деп танылып, оған нысанды киімі мен арнайы киім-кешегі тәркілене отырып, 21 625 теңге мөлшерінде әкімшілік айыппұл салынсын", – делінген құжатта.

Бұған дейін Ақтаудағы осыған ұқсас жағдай туралы хабарланған болатын. Онда ер адам жарнамалық ролик түсіру үшін полиция формасын киіп, айыппұл арқалаған еді. Сот мәліметінше, ол Толықын-1 шағынауданындағы мектеп маңында полиция формасын киіп, видео түсіріп, оны әлеуметтік желіде жариялаған. Ер адам кінәсін мойындап, өкініш білдірді. Сот мұны жеңілдететін мән-жай ретінде ескеріп, оған 21 625 теңге көлемінде айыппұл тағайындады.

Google News арқылы жаңалықтарымызды қадағалаңыз