Алтынның бағасы түсті

Жалпы жаһанда бағалы металға бағыныштылық байқалады. Бұның бірден-бір себебі - әлемдегі тұрақсыздық. Орталық банктердің алтынға деген жоғары қажеттілігі сұранысты күшейтті. Дегенмен бүгін күтпеген жерден алтын бағасы күрт төмендегенін қалай түсінеміз? 

Алтын айналасындағы адамдар алатаңмен аң-таң. Бірнеше айдан бері бағасы аспандаған сирек металл бір тәулікте 230 долларға арзандады. Нақ қазіргі уақытта 4 мың 113 доллар болды. Кірпідей жиырылған инвесторлардың көңілі жайланған шығар. Жалпы алтынның құнына тек өндіріс емес, елдер арасындағы емеурін де әсер етеді. Сарапшылар АҚШ пен Қытай арасы жыли бастағанын аңғарған. Алайда Ресей мен Украина жағдайы реттеле қоймады. Ал алтын қашаннан сақтандырудың инвестициялық активі ретінде қолданылады. Яғни дағдарыс кезінде қай валюта болмасын құны құлдырайды. Бұндайда негізгі төлем құралына алтын айналады. Сондықтан қымбат металға сұраныс артады. 

Руслан Мұхамедұлы, аккредиттелген геммолог:

- 15 жылдан бері әшекей бұйымдарын жасаушы ретінде күн сайын бақылап отырамын. Алтын бағасы 10 жыл қатарынан өсіп келеді. Сондықтан бұл мен үшін жәй ғана инвестиция емес, бұл қорғаныс құралы. Қағаз ақшалар құнсызданса алтын үнемі сенімді инвестиция боп қала береді. 

Ұлттық банктің дерегінше екі ай бұрын алтынның бір граммы 58 мың теңгеге жуықтаған. Ал дүниежүзілік алтын кеңесінің мәліметіне сәйкес елдің алтын қоры жеті жарым тоннаға шамалас. Осылайша жалпы алтын қоры 298 тоннадан асты. 

Сұлтанбек Мәкежанов, ҚР Парламенті Сенатының депутаты:

- Еліміз дамып жатса бір жағынан сол алтын қорының септігі үлкен. Себебі, біз басқа елдерден қаржы аламыз ғой. Сол қаржы алғанда біздің қорымыз қаншалықты, резервіміз қаншалықты сол арқылы бағаланады. Соның бірі Ұлттық қор, екіншісі алтын қоры. Басқа елдерде бағалап, қаржылық көмек жасаған кезде, экономикамызға инвестиция салған кезде сол мәселелерді есептейді. Сондықтан ол ел дамуының бірден-бір көрсеткіші деп есептейміз.

Алтын бағасының артқанына халықтың алаңдайтынын да айту керек. Себебі, қымбатшылықтың белгісі ретінде көреді,-дейді экономистер. Алайда алтын экспортынан көбірек пайда табу жағы да бар. Сосын теңгені қорғауға мүмкіндік алады.

Қажыгелді Шамбыл, экономист:

- Алтынның қоры әсер етеді ұлттық банк егерде белгілі бір жағдайлар болса, сол интервенция, қаржыландыру болады. Ал, алтынның пайдасын инвестициялық актив ретінде ел-жұрт көрмейді. Бұның ел-жұрт пайдасын көруі мүмкін егер инфляция 20 пайыз болып, доллар теңгеге шаққанда 700 болса, міне, сол жағдайда рас, алтынның мол көлемі болса алтынның валютаны сақтап қалуға үлкен қабілеті бар.

Алайда экономистің пікірінше алтынды рекордтық мәнін жаңартқан кезінде сатып алып жатырмыз. «Ал егер алдағы жылдары бағасы арзандаса таң бозындағы жаңалықтай таң қалудың көкесі сонда болады. Сондықтан алтынға жұмсалған қаржыны өндіріске салған ақылға қонымды», - дейді сарапшы. Өйткені, қуатты экономика – елдің құты. 

Авторлары: Нысаналы Ығыл, Ержан Қанапияұлы, Мерей Талап