AMANAT партиясы және Жастар Рухы белсенділері Жайық өзенінің жағалауын қоқыстан тазартты

Мемлекет басшысы Қасым-Жомарт Тоқаевтың бастамасымен ел аумағында «Таза Қазақстан» жалпыұлттық жобасы жүзеге асырылып жатыр. Соның аясында «AMANAT» партиясы барлық өңірде дәстүрлі «Таза бейсенбі» акциясын өткізіп келеді. Аталған іс-шара – экологиялық мәдениетті қалыптастыруға, қоғам бірлігін нығайтуға және әрбір азаматтың табиғатты қорғауға деген жауапкершілігін арттыруға бағытталған. Акцияға партия мүшелерімен қатар жергілікті тұрғындар, жастар және волонтерлер де белсенді атсалысып жатыр, – деп хабарлайды Aikyn.kz.

Атырау қаласында «AMANAT» партиясының және «Жастар Рухы» жастар қанатының 50-ден астам белсендісі Авангард шағын ауданындағы Ж.Төлепов көшесі бойындағы  Жайық өзенінің жағалауын қоқыстан тазартты. Сонымен қатар олар жергілікті балықшыларға тазалық сақтаудың маңызын еске салды.

«Қоғамның экологиялық мәдениеті тұрғысынан алғанда, бес жыл бұрынғы жағдаймен салыстырсақ, азаматтар қазір қоршаған ортаға әлдеқайда жауапкершілікпен қарайды. Дегенмен экологиялық мәдениеттің маңызын нығайту үшін осындай іс-шаралар ұйымдастыру қажет. Себебі ауа мен жердің, судың, сонымен қатар өмір сүріп жатқан қаламыздың ажарына баршамыз жауаптымыз», – деді «Жастар Рухы» Атырау облыстық филиалының төрағасы Абылай Құрметұлы.

Ал Петропавлда партия белсенділері мен волонтерлері интернационалист-жауынгерлерге арналған стела орналасқан саябақты ретке келтірді. Қатысушылар қоқыс пен қураған жапырақтарды жинап, көшелерді сыпырды. Стеланың жай-күйіне және айналасындағы аллеяға ерекше назар аударылды. 

Ұйымдастырушылар «Таза бейсенбі» акциясы жастарға жауынгерлердің ерлігін есте сақтауға мүмкіндік беретінін атап өтті. Ресми мәліметтерге сәйкес, Ауған соғысына шамамен 22 мың қазақстандық азамат қатысқан, олардың 1,5 мыңы Солтүстік Қазақстан өңірінің тумалары. Қатысушылардың айтуынша, мұндай орындарды ретке келтірген кезде тарихпен сабақтастық сезіледі және батырларды тек сөзбен емес, іспен де сақтау қажет екенін ұғындырады.

Сараптама, зерттеу мақала, күнделікті өзекті ақпаратты «Айқынның»  TELEGRAM арнасынан табасыз.