Amazon Web Services орталықтарына БАӘ мен Бахрейнде өрт салдарынан зақым келді

Оқиға бұлтты сервистер жұмысының уақытша тоқтауына ықпал етіп, цифрлық қауіпсіздік саласындағы сарапшылардың алаңдаушылығын тудырды.

— Екі аймағымызда белгілі бір заттардың түсуінен электрмен жабдықтауда үзілістер болды, содан кейін электр қуаты сөнді, — делінген Amazon компаниясының ресми мәлімдемесінде.

Бұл ретте компания ықтимал сыртқы шабуылдармен байланыстың бар-жоғын нақтыламады.

Сарапшы Шанака Ансельм Перера орталыққа әскери қақтығыс салдарынан физикалық зақым келгенін мәлімдеді.

— Зымыран немесе ұшқышсыз аппарат сынықтарын Amazon «нысан» деп жіктейді, өйткені корпоративтік терминологияда мұндай жағдайларға қатысты сценарийлер жоқ. Бұл соғыс кезінде тікелей соққыдан жаһандық бұлтты алпауыттың деректерді өңдеу орталығы зардап шеккен тарихтағы алғашқы жағдай, — деді ол.

SODİMER цифрлық қауіпсіздік зерттеулер орталығының негізін қалаушы, профессор Левент Эраслан цифрлық инфрақұрылымға жасалатын шабуылдардың стратегиялық маңызын атап өтті.

Оның айтуынша, Иранның шабуылы тек әскери бағытта ғана емес, цифрлық инфрақұрылым арқылы да жүзеге асырылып жатыр.

— Бүгінде деректерді өңдеу орталықтары, бұлтты жүйелер мен желілер энергетикалық нысандар немесе әскери базалармен бірдей маңызға ие. Деректерді бақылау — заманауи соғыстың негізгі майдандарының бірі. Мұндай әрекеттерді АҚШ-тың технологиялық инфрақұрылымына қарсы киберқуаттың белгісі ретінде қарастыру қажет. Цифрлық дәуірде деректер мен инфрақұрылымды бақылау — әскери іс-қимылдардың көзге көрінбейтін, бірақ аса маңызды майдандарының бірі, — деді профессор.

Бұған дейін АҚШ Қарулы күштері Тегеранның ядролық және зымырандық әлеуетін жоюға бағытталған Иран аумағындағы ауқымды операцияларын жалғастырып жатқаны хабарланған болатын. АҚШ президенті Дональд Трамп операцияның басты мақсаты — Иранның ядролық қару жасауына жол бермеу және Еуропа мен АҚШ-қа төнетін қатерді бейтараптандыру екенін мәлімдеді.

Осыған дейін Израиль мен АҚШ бірлесіп Иранға қарсы операция бастағаны туралы жаздық.