Ақмола облысының тұрғыны ұлының жазасын жеңілдету үшін алаяққа 10 миллион теңге берген

Ақмола облыстық полиция департаментінің хабарлауынша, Ақкөл ауданының тұрғыны полицияға 10 миллион теңгенің ұрланғаны туралы арызданған.

Жәбірленушінің айтуынша, ол өмір бойына бас бостандығынан айырылған баласына құқықтық көмек көрсету үшін заңгердің кеңесін алмақ болған.

— Ол достары мен туыстары арқылы белгісіз ер адаммен байланысқа шыққан. Күдікті оған білікті құқықтық қорғау ұйымдастырып, өмір бойына бас бостандығынан айыру жазасын белгілі бір мерзімге ауыстыруға ықпал ете алатынына сендірген. Ол көрсеткен қызметі үшін 10 миллион теңге ақы талап еткен. Жәбірленуші қажетті соманы жинап алып, күдіктіден заңды қызмет көрсеткені туралы қолхат алып, жеке өзі тапсырды, — деп түсіндірді департаменттің баспасөз қызметі.

Алайда, ер адам алған ақшасын өз пайдасына жұмсаған: несиелерін өтеп, қарыздарын жауып, көлік сатып алған. Алайда, ол уәде етілген қызметті көрсетпеді. Көп ұзамай алаяқ байланысқа шығуды тоқтатты.

Жәбірленуші көмек сұрап полицияға хабарласқан. Тәртіп сақшылары оқиғаға қатысты сотқа дейінгі тергеу жұмыстарын бастады.

— Азаматтарды қырағы болуға және ақылы түрде сот шешімдеріне ықпал етуге уәде бергендерге сенбеуге шақырамыз. Барлық заңгерлік көмек бойынша тек уәкілетті және лицензиясы бар мамандарға хабарласуларыңызды сұраймыз, — деді полиция қызметкерлері облыс тұрғындарына.

Ақмола облысындағы алаяқтық іс бойынша бұрынғы директор сотталды.