​АҚШ ірі әуежайларында рейстер саны 10% қысқарады

Федералдық азаматтық авиация басқармасы (FAA) жұма күні ондаған ірі әуежайда рейстер санын қысқартатынын мәлімдеді, деп хабарлайды Евронью́с. 

Егер үкімет жұмысының тоқтауын (шатдаун) тоқтатуға келісімге келмесе, бұл шешім күшіне енеді. Бұл туралы АҚШ-тың көлік министрі Шон Даффи хабарлады.

Ұшулар ең жоғары жүктемесі бар 40 бағытта 10% қысқарады. Шешім қызметкерлер тапшылығы мен шатдаун салдарынан қызметкерлерге түсіп жатқан қосымша жүктемеде қауіпсіздікті қамтамасыз ету мақсатында қабылданған.

FAA тәулігіне 44 мыңнан астам ұшуды басқарады (жолаушылар, жүк және жеке рейстер). Сондықтан шектеулер ел бойынша мыңдаған рейске әсер етуі мүмкін.

Қандай әуежайлар мен қалаларға бұл шара қатысты болатыны әзірге нақты айтылмады. Шектеулер жағдай тұрақталғанға дейін күшінде болады.

FAA басшысы Брайан Бедфорд баспасөз мәслихатында былай деді:

"Азаматтық авиация саласында 35 жыл жұмыс істеп келемін, мұндай шешім қабылдаған кезіміз есімде жоқ."

Авиадиспетчерлер 1 қазаннан бері еңбекақысыз жұмыс істеп келеді және көпшілігі аптасына алты күн істейді. Олар заң бойынша жұмысты жалғастыруға міндетті, тіпті жалақы уақытша төленбесе де. Көпшілігі қаржы қиналғандықтан қосымша жұмыс істеуге мәжбүр, кейбіреулері сырқаттанып, демалыс алуда. Бұл әуежайларда кадр тапшылығына және рейстердің кешігуіне алып келді.

Бедфорд авиадиспетчерлердің шаршауы туралы пилоттардың қауіпсіздік жөніндегі ерікті хабарламалары артқанын атап өтіп, алдын ала әрекет ету қажеттігін айтты:

"Қауіпсіздік мәселесі айқын көрінгенше күтпейміз. Қазір-ақ жағдайды ушықтырмайтын қадамдар жасауымыз керек," — деді ол.

"Ұшу қауіпсіздігі бүгін де, ертең де жоғары деңгейде болады. Қажет болса қосымша шара қолданамыз."

United, Southwest және American Airlines секілді ірі әуекомпаниялар жолаушыларға қолайсыздықты азайтуға тырысатынын жеткізді.

FAA жақын күндері әуекомпаниялармен кездесіп, жаңа жоспарды іске асыру жолдарын талқылайды.

Cirium талдау компаниясының бағалауынша, шектеу:

1 800 рейске

268 000 орынға әсер етуі мүмкін.

Мысалы, Чикагодағы О'Хара халықаралық әуежайында жұма күні жоспарланған 1212 рейстің 121-і қысқаруы мүмкін.

Шатдаун тарихтағы ең ұзынына айналды. Өткен демалыста әуе қозғалысын басқару объектілерінде кадр тапшылығы ең жоғары деңгейге жетті. Жұма мен жексенбі аралығында кемінде 39 басқару нысаны кадр жетіспеуі мүмкін екендігін мәлімдеді — бұл әдеттегі көрсеткіштен әлдеқайда жоғары.

Ірі әуекомпаниялар, авиация ұйымдары және туризм саласының өкілдері Конгрессті шатдаунды тоқтатуға шақыруда.

Бүгін, 13:47