Ақша да жоқ, үйірме де жоқ: ата аналар Yaya сервисіне қатысты жаппай шағым айтуда

Tesla Education оқу орталығының айналасындағы дау аяқталмай жатып, балалар үйірмелеріне арналған YaYa қосымшасын қолданушылар бас көтерді. Ата-аналардың айтуынша, компания абонементтер үшін төлем алғанымен, оны оқу орталықтарына уақытылы аудармаған. Соның салдарынан көптеген келісімшарттар бұзылып, балалар үйреншікті үйірмелеріне бара алмай отыр. Ал YaYa қаржылық модельдің күйрегенін мойындап, міндеттемелерді кезең-кезеңімен реттеуге уәде берді.

Бізден мәселені жұртшылыққа жеткізуді сұрап хабарласқан ата-аналар бүгінде қыруар қаржы төлесек те, қызмет ала алмай отырмыз деген шағымын айтты. Олардың қатарында бір емес бірнеше баласына бір жылға абонемент алған отбасылар да, көрсеткен қызметі үшін әлі ақы алмаған оқу орталықтары да бар.

Мәселені шешу үшін хабарласқан қолданушыларға компания қызметкерлері «сіздерге біз әу бастан тым үлкен жеңілдік жасадық, соны жасамау керек еді» деген  жауап қайырған.

– Өзіміз ауылда өстік, түрлі үйірмелерге баруға мүмкіндік болған жоқ. Сондықтан барынша баланың дамуына көңіл бөлеміз. Осы мақсатта екі балама 760 мың теңгеге YaYa қосымшасының бір жылдық абонементін сатып алдым. Соның тек 5 айында ғана балам қосымшаларға барды. Бірақ соңғы уақытта 4 рет оқу орталығын ауыстыруға мәжбүр болдық. Нәтижесінде балам ағылшын тіліндегі бір грамматиканы төрт жерден өтіп шықты, бір сөзбен айтқанда бір тақырыпты төрт рет, төрт түрлі жерден өтті, – дейді Айнұр есімді Yaya қосымшасын қолданушы.

Оның айтуынша, орталықты осылай жиіс ауыстырғаннан кейін баланың үлгерімінде ешқандай нәтиже болмаған.

–  Ал менеджерлерге оқу орталықтары неге бізді ары қарай қабылдамайды десең, айтатындары «ішкі кухнямызда қаржылық проблемалар болып жатыр, кезінде сіздерге үлкен жеңілдіктер жасадық, соны жасамау керек еді», дейді. Кезінде бізге ұсынғанда маркетингтары күшті болды, ал компанияның ішкі проблемасы енді неге бізді толғандыруы керек, – деп ашына жауап берді ата-ана.

Айнұр бұған дейін де балаларын ағылшынға, бассейнге апарғанын, сондықтан нарықтың бағасын білетенін айтады.

– Мысалы, балада аутизмі болса, дем алуы әлсіз болса, бассейн керек екенін білеміз. Сол себепті бізге ыңғайлы әрі тиімді болғандықтан ғана сатып алған едік. Қазіргі таңда 150 мың теңге өз қалтамнан шығарып заңгер жалдап отырмын. Мақсатым қалған 600 мың теңгемді қайтарып алу. Одан бөлек, емізулі балам болғандықтан, қазіргі жағдайдың барлығы маған әсер етіп отыр, – дейді ата-ана.

Проблемамды азайтамын деп, керісінше, көбейтіп алдым деген ол баламның қосымшасына төлеген қаражатты мемлекеттен алатын жәрдемақыдан жырып алғанын жеткізді.

– Өзім енді ғана босанғанда, сол 760 мыңға пособиямнан жырып өзім санаторияда ем алмай, балаларым білім алсын дегенде мына YaYa-ның істегенін қараңызшы. Олардың қаншама подписчиктары бар, маркетингтары бар, басында сөйлеген кезде күшті болды. Үлкен компания болғандықтан сендік. Каспи банкке звондағанда қазір олардың қызметтері сатылымда жоқ деп қана жауап берді. Енді ата-аналар балалар қосымшаға бармаса да бөліп төлеуге алған соманы төлеуге мәжбүр. Сол нәрсе жанға батады, – дейді Айнұр.

Оның айтуынша, компания өзге ата-аналарға елу пайызын ұстап қаламыз да, қалған сумманың ішінен баланың келген күндерін шегеріп қайтарамыз деген.

– Бізге де солай істеуі әбден мүмкін. Қызметті сатып алған кезде мұндай шарттардың ешқайсысы да түсіндірілмеді. Ал бізге көрсеткен келісімшарттың бесінші тармағында егер сіздің тарапыңыздан келісімшарт бұзылса, 50 пайызы ұсталады деп тұр. Сонда төрт орталық жабылса да, келесімді біз бұзған болып есептеле ме?, – дейді қосымша қолданушысы.

Ал Аида есімді қолданушы компанияға сотқа дейінгі талап-арыз жолдағанын айтты. Дегенмен компаниядан мұндай талаппен келіспейтіні жайында жауап келген.

– Алғашында бәрі қалыпты жүрді. Алайда қазан айында спорттық гимнастика жабылды, кейін бассейн жұмысын тоқтатты, ал қараша айында «Развивашка» орталығы жазылуды мүлде тоқтатты. «Развивашканың» директоры YaYa компаниясының оларға шамамен екі айдан бері төлем жасамағанын, тіпті қызметкерлердің жалақысын өз қалтасынан төлеп отырғанын ашық айтты, – дейді ол.

Қолданушы желтоқсан айында көрсетілмеген қызметтер үшін ақшаны қайтаруды талап еткен.

– Алайда олар қайта есептеп, мен абонементтің жарты жылын «пайдаланып қойғандай» көрсетіп, 660 000 теңгенің орнына шамамен 300 000 теңгені ғана қайтаруды ұсынды. Адвокатыммен бірге сотқа дейінгі талап-арыз жолдадық. Олар оны қабылдап, қол қойғанымен, келесі күні талаппен келіспейтіндері туралы хат жіберді, – дейді Айнұр.

Оның айтуынша, қазірдің өзінде кейбір ата-аналар ақшаны қайтару туралы келісімдерге қол қойып қойған, бірақ 1 айдан 4 айға дейін күтсе де, әлі күнге дейін қаражаттарын қайтара алмаған.

– Менің абонементім қазір «қатырылды». Қызмет көрсетілмейді, ақша қайтарылмайды. Біздің мақсатымыз – тек көрсетілмеген қызметтер үшін төленген қаражатты қайтарып алу, – дейді ол.

Мұндай ата-аналардан бөлек оқу орталықтары да компанияның дер кезінде төлемдер жасамағанынан шығын көріп отырғанын айтуда. Солардың бірі Step by step орталығы. Орталық өкілі алғаш рет 2024 жылдың соңында күмәнді жайттар пайда бола бастағанын жеткізді.

– 2024 жылдың қазан немесе қараша айларында 2-3 ай төлемдер болған жоқ. Кейіннен барлығы орныққандай болды, уақытында төлемдер жасалып жатты. Нағыз проблема тамыз, қыркүйек айында басталды. Осы екі айда мүлде төлем жасалмады. Тек қараша айында оларды қатты қыспаққа алғаннан кейін төледі. Қазіргі таңда мен олардан қазан, қараша, желтоқсан, қаңтар айлары үшін төлемдер жасауын күтіп отырмын. Ол жерде де 70-80 мыңдай бар әлі, сондықтан слоттарды тоқтаттым, өйткені мұғалімдерге де ақысын төлеп, материалдар алуым керек. Енді не жағдай болып жатқаны түсініксіз, – дейді ол.

Step by step орталығы ендігі заңгермен бірге сотқа дейінгі талап-арыз жолдап, әрі қарай серіктестікті тоқтатуға мәжбүр екенін айтуда.

– Қазан, қараша айынан бері бері барлығын "міне, транш күтіп отырмыз, бізге әне-міне аударуы қажет, 15-іне дейін, 31-іне" дейін деп "ертеңмен" тойғызып келеді, ал нәтижесінде түк шықпады. Сондықтан енді төлемдерді жіберу туралы компанияға сотқа дейінгі талап-арыз жібереміз, ары қарай бұл компаниямен жұмыс істеудің мәнін көріп тұрған жоқпын. Ең бастысы балаларға жаным ашиды, мысалы, қаңтарда ата-аналардың өтінішімен ғана қайта слоттарды ашқан едім. Ал қазір бәрі шегіне жетті, – дейді орталық өкілі.

Yaya компаниясы да өзінің әлеуметтік желідегі парақшасында соңғы екі айда туындаған қаржылық қиындықтарға байланысты мәлімдеме жасады.

«Балалардың жан-жақты дамуына мүмкіндік беру және бір ғана орталықпен шектелмеуі үшін қатысу ақысын өз қаражатымыз есебінен субсидияладық. Алайда даму барысында қолданыстағы қаржылық модельдің нарықтық жағдайларға төтеп бере алмайтыны белгілі болды. Қарапайым тілмен айтқанда, абонементтер өзін-өзі ақтамады әрі бизнестің шығынға ұшырауына алып келді. Бұл жағдай кассалық алшақтықтың пайда болуына және жобаның операциялық әрі қаржылық құрылымын қайта қарау қажеттілігіне себеп болды», – делінген мәлімдемеде.

Yaya бұл кезеңде жобаны сақтап қалу және тұрақтандыру мақсатында инвесторлармен және серіктестермен келіссөздер жүргізгенін атап өтті. Сонымен қатар, компания клиенттермен байланыс кешігіп қалғанын мойындап, кешірім сұрады. Қазіргі жағдайға қатысты Yaya шектеулі қаржы ресурсын тарту бойынша келісімдерге қол жеткізгенін мәлімдеді.

«Бүгінгі таңда компания шектеулі қаржы ресурсын тарту бойынша келісімдерге қол жеткізді. Бұл клиенттер мен серіктестер алдындағы міндеттемелерді реттеу процесін бастауға мүмкіндік береді», – деп хабарлады компания.

Компания жақын арада әрбір клиентпен және серіктеспен жеке байланысқа шығуға уәде берді. Олардың айтуынша, әр тарапқа қазіргі мүмкіндіктерге сай нақты шешім ұсынылады.

Сондай-ақ, YaYa компаниясы 1 ақпаннан бастап қосымшаға кіру уақытша шектелетінін хабарлады. Онда бұл шешім жобаны қайта құрылымдау және клиенттер мен серіктестер алдындағы міндеттемелерді реттеу үшін қабылданғаны айтылған.

Естеріңізге сала кетейік, осыдан бірер жыл бұрын қосымшаның негізін қалаушылар компанияның айналымы 1 млн АҚШ долларына жетті деп мәлемдеген. Сондай-ақ Yaya стартапы Еуразиядағы 500 Global акселерация бағдарламасынан өткенін және жетекші венчурлық қордан $100 мың көлемінде инвестиция тартқаны белгілі болған еді.