Ақтауда апатқа ұшыраған ұшақтың жолаушысы ауыр дерттен көз жұмды

Ақтау маңында апатқа ұшыраған «Әзербайжан әуе желілері» (AZAL) компаниясының Embraer 190 ұшағының жолаушысы Нурулла Сираджов өмірден өтті, деп Arasha.kz тілшісі Lent.az сайтына сілтеме жасап хабарлайды.

Загатала тұрғыны Нурулла Сираджов 18 қазан таңертең өз үйінде қайтыс болған.

Oxu.az-тың дерегінше, 2024 жылғы 25 желтоқсанда Нурулла Сираджов жұбайымен бірге Грозныйда тұратын ұлын көруге жолға шыққан. Алайда ұшақ апатқа ұшырап, ерлі-зайыптылар ауыр жарақат алып, ауруханаға жеткізілген.

Белгілі болғандай, ер адам қатерлі ісікке шалдыққан және ол Грозныйға осы сырқатына байланысты операция жасатуға бара жатқан. Бірақ апат салдарынан ота жасалмай қалып, Сираджов жарақаттарымен бірге Бакудегі ауруханаға жеткізілген.

Кейін ол апаттан алған жарақаттарынан айыққанымен, ауыр дертін жеңе алмады.