Ақтауда көлік прокуроры пара алу кезінде қолға түсті

Прокурор Аслан Исанов парамен ұсталды. Оны кәсіпкер Азамат Ордабаевпен бірге басқа бір қылмыстық істің фигуранты Сәттікұловадан 2,5 млн теңге алмақ болды деген айыппен соттады. Олар әйелге үкімді жеңілдетіп, түрме жазасынан құтқарамыз деп уәде берген, деп хабарлайды Arasha.kz.

Сот материалдарына сәйкес, Сәттікұлова Исановпен Ордабаев арқылы танысқан. Ордабаев прокурорды «соттармен кең байланысы бар жоғары шенді адам» деп таныстырып, кез келген мәселені шеше алады деп сендірген.

Исанов мәселені «шешу» үшін 2,5 млн теңге керегін тікелей айтқан. Сәттікұлова келісіп, ақша жинауға уақыт сұрағанымен, өзі бірден ҰҚК жанындағы Антикоррупция қызметіне барып, «делдалдарды» әшкерелеген.

Жедел топ іске қажет нәрсенің бәрін қолданды: белгіленген купюралар, тыңдау құрылғылары, бақылау. Ақша беру күні Сәттікұлова оларды Volkswagen Passat көлігінің артқы орындығына қойған. Сол жерде екі тарап кездескен.

Әйел көліктен шыға сала, оқиға орнына күштік құрылымдар келіп, Исанов пен Ордабаевты дәл үстінен түскен кезде ұстады.

Сотта екеуі де кінәсін мойындап, қарсы шықпағандықтан, іс жеделдетілген тәртіппен қаралды. Ерекше жайт — прокурорды сыбайлас жемқорлық бабымен емес, алаяқтықпен соттады: яғни ол «бөтен ақшаны алдап алмақ болды» деген баппен.

Аслан Исанов екі жыл жеті айға бас бостандығынан айырылды. Оған мемлекеттік қызметте, сот органдарында және қаржы құрылымдарында өмір бойына жұмыс істеуге тыйым салынды. Ал кәсіпкер Азамат Ордабаев түрмеден құтылып кетті: ол жәбірленушімен татуласып, сот оны қылмыстық жауапкершіліктен босатты.

Үкім әлі күшіне енген жоқ.