Ақтауда меценаттарға Жомарт жан сыйлығы тапсырылды

Ақтауда қайырымдылық жасаудан таймайтын пейілі кең жандар марапатталды.

Дәстүрлі «Жомарт жан» сыйлығын табыстау рәсімі «Достық» үйінде өтті. Салтанатты шараға Қазақстан халқы Ассамблеясы төрағасының орынбасары Марат Әзілханов, сенаторлар және жергілікті мәслихат депутаттары мен этномәдени бірлестіктердің өкілдері мен волонтерлер қатысты.

Хитеш Чандра Вододария 2020 жылы Ақтауда үнді этномәдени бірлестігін құрды. Бұл ұйым Үндістанның бай мәдениеті мен әдебиетін, салт-дәстүрін көпшілікке дәріптеп жүр. Бірлестік мүшелері қайырымдылық шаралардан қалыс қалмайды. Хитеш бүгін «Жомарт жан» төсбелгісімен марапатталған меценаттың бірі.

Хитеш Чандра Вадодария , «Сәлем намасте» Үнді этномәдени бірлестігінің жетекшісі:

- Бұл награданың біз үшін маңызы зор. Қазақта «Жақсылық жасап жарыс» дейтін аталы сөз бар. Үнді этномәдени бірлестігі осы нақылды берік ұстанған. Қазір Үндістанның Қазақстандағы елшілігінің қолдауымен мұғалім, инженер, дәрігерлер үшін көптеген бағдарлама жүзеге асып келеді. Мыңдаған қазақстандық үнді елінде біліктілік арттырды.

Ақтауда «Алғыс айту» күні «Қайырымдылық керуені» республикалық шарасы бастау алғаны мәлім. Оның аясында Қазақстан халқы Ассамблеясының 30 жылдығына орай «30 игі іс» жобасы қолға алынды. Маңғыстау облысында 200-ден астам еңбек адамына сый-құрмет көрсетілді. «Жомарт жан» орталығы балалар үйінің тәрбиеленушісі үшін банкте депозит ашты. Оған жеткіншек кәмелетке толғанша ақша аударылады. «Мектепке жол» акциясы аясында жүздеген балаға оқу құралын сатып алуға сертификат берілді. Бұл, биыл атқарылған игі істің бірсыпырасы ғана.

Әлішер Сатыбалдиев , ҚР Парламенті Сенатының депутаты:

- «Қайырымдылық керуенінің» аясында жомарт жандардың атқарып жатқан жұмысын қай жерден көрдік? Өткен жылы еліміздің 20 өңірін су алған кезеңде олардың қайырымдылығын көрдік. Ассамблеялықтар ең алдыңғылардың қатарында барып, сол жерде жүректен-жүрекке деп тұрып, акция өткізу, соның барлығының басы-қасында болды.

Сондай-ақ «Достық» үйінде «Ассамблея. Парламент. Мәслихаттар» жобасының өңірлік кезеңі талқыланды. Алқалы жиында Мемлекет басшысының Қазақстан халқы Ассамблеясының 23-ші сессиясында жүктеген тапсырмаларды өңірлерде іске асыру мәселелері сөз болды. Кездесу соңында бір топ азаматқа ҚР Президенті Әкімшілігі Хатшылығы және Парламент Сенатынан жолданған «Құрмет» грамотасы мен Алғыс хат табысталды.

Авторлары: Талғат Исламұлы, Саламат Бекбаев