Аса маңызы бар дәрілердің 37 пайызы елде өндіріледі

Елімізде ұлттық фармацевтикалық өнеркәсіп дамып, ішкі нарықтағы дәрілік заттардың үлесі артып жатыр. Келер жылға арналған препараттарды сатып алу аясында олардың бағасы 50 пайыздан 300 пайызға дейін төмендеді. Яғни бұл – көптеген дәрі-дәрмек бағасының арзандай түскенін көрсетеді. Бұған Денсаулық сақтау министрлігінің атқарған шаралары сеп болды. 

Дәрі-дәрмекке баға белгілеудің жаңа цифрлық жүйесі іске қосылды. Яғни өндіруші бағасын тіркеудің бірыңғай тәсілі енгізіліп, маркетингтік және көлік үстемелері алынып тасталды. Сөйтіп қымбат препараттардың қолжетімді баламасы 30 пайызға арзандай түсті. Соның нәтижесінде қазір нарық қатысушылары үшін біркелкі әрі ашық ережелер қалыптасып отыр. Енді мемлекет халықты қосымша дәрі-дәрмекпен қамтуда отандық фарм компаниялардан тиісті препараттарды арзан бағада сатып алатын болады.

Ақмарал Әлназарова, ҚР Денсаулық сақтау министрі:

- Министрлік дәрілік заттарға баға белгілеудің жаңа тетігін енгізді. 2026 жылға арналған сатып алулар толықтай жаңартылған жүйе арқылы жүзеге асырылуда. Бірқатар жоғары шығынды дәрілік заттар бойынша бағаның төмендеуі 50-ден 300 пайызға дейін жетті. Жаңа баға қалыптастыру механизмі негізінде бөлшек және көтерме сауда үшін 4900 атауы бойынша бағалар қайта қаралды. Ағымдағы жылдың қазан-қараша айларында бөлшек сауда желісін мониторингтеу нәтижесінде халық арасында сұранысқа ие препараттардың бағасы орта есеппен 12%-ға төмендеді.

Дәрі-дәрмек бағасының өзгеруі – өндірушілер мен жеткізушілерге жақпай қалуы мүмкін. Алайда мемлекет бірінші кезекте халықтың қажеттілігін ойлауы керек. Отырыста Премьер-министр осылай деп, отандық фармацевтикаға қаржы тарту көздерін көбейту бойынша инвестициялық келісімдер жасалып жатқанын айтты. Қазір бұл бағытта тоғыз жоба қолға алынған. Енді жауапты ведомство мүделлі мемлекеттік органдармен бірігіп, үш айда барлық келіссөзді реттеуі қажет.

Олжас Бектенов, ҚР Премьер-Министрі:

- Биыл препараттарға бағаны төмендетудің арқасында мемлекет дәрілерді сатып алуда 36 млрд теңгеден астам қаржы үнемдеді. Бұл қаражат халықты қосымша дәрімен қамтамасыз етуге бағытталады. Сатып алу бағаларының төмендеуі өндірушілер мен жеткізушілерге ұнай бермейтіні түсінікті. Алайда біз азаматтарымыздың мүдделерін басшылыққа алуымыз керек. Дәрілер әділ бағамен сатып алынатын болады. Отандық фарм өндірушілерге айтарым: біз сіздерді әрі қарай да қолдаймыз. Оған ешқандай күмән болмасын. Десе же мемлекеттік қолдау шаралары сапалы медициналық өнімді жеткізетін және бағаны жасанды түрде өсірмейтін нарықтың адал қатысушыларына ғана көрсетіледі.

Жалпы елдегі өңдеу өнеркәсібінде оң динамика бар. Жыл басынан бері металлургия, машина жасау, химия өнеркәсібі және құрылыс материалдар өндірісі 5,8 пайызға артқан. Отырыста сөз алған Өнеркәсіп және құрылыс министрі биыл құны 1,5 триллион теңгеге жуықтайтын 147 жобаның іске қосылғанын мәлімдеді. Нәтижесінде, 18 мыңнан астам жаңа жұмыс орны ашылыпты. Сондай-ақ қазір салада сандық жүйеге де айырықша назар аударылған. Былтыр цифрлық технологияларды енгізген кәсіпорындардың үлесі 19 пайызға өскен.

Ерсайын Нағаспаев, ҚР Өнеркәсіп және құрылыс министрі:

- Тау-кен металлургия саласында роботтардың виртуалды көшірмелері, өндіріс алаңдарынан жиналған үлкен деректерді өңдеу, компьютерлік көру технологиялары және роботтанған жабдықтар қолданылады. Химия өнеркәсібінде ресурстарды жоспарлау жүйелері, сондай-ақ еңбек қауіпсіздігін қамтамасыз ету құралдары белсенді енгізілуде. Қазірде жер қойнауын пайдаланушылардың сатып алу қызметін талдауға мүмкіндік беретін Tizilim ақпараттық жүйесі жұмыс істеуде. Онда алты мыңнан астам тапсырыс беруші мен тоғыз жүз отандық өнім өндіруші тіркелген. 

Қазір елдің барлық өңірін инфрақұрылыммен және  индустриялық алаңдармен қамту бойынша жүйелі жұмыс жүргізіліп жатыр. Республикада 16 арнайы экономикалық аймақ бар. Оларға 10 триллион теңгеден астам инвестиция тартылған. 

Авторы: Альмира Оразбай