Astana IT University әлемдік MIT желісіне енген алғашқы отандық университет

Массачусетс технологиялық институты (MIT) құрған GLEEN жаһандық желісі – инновация, технология және стартап мәдениетін дамытатын ең ірі халықаралық қауымдастықтардың бірі. Бұл желіге Солтүстік Америка, Еуропа, Африка және Латын Америкасындағы алдыңғы қатарлы университеттер мүше. GLEEN-нің басты құндылығы – студенттер мен оқытушыларға MIT-тің кәсіпкерлік мектебінде қолданылатын әдістемелерді, оқыту құралдарын және стартап құрудың әлемдік стандарттарын тікелей пайдалану мүмкіндігі, деп жазады Egemen.kz. 

Осы беделді желіге елімізден тұңғыш болып Astana IT University (AITU) қосылды. Бұл – еліміздің инновацияға бағытталған жаңа кезеңге қадам басқанын айқын көрсететін маңызды оқиға.

Astana IT University енді MIT-тің кәсіпкерлікке арналған толыққанды білім беру жүйесін енгізеді. Яғни университет жекелеген курстарды ғана емес, инновация мен бизнес құруға арналған тұтас «операциялық жүйені» қабылдайды. MIT әзірлеген Disciplined Entrepreneurship (24 қадам) және 15 Startup Tactics атты танымал әдістемелер AITU-дың бакалавр, магистратура және акселератор бағдарламаларының негізіне айналады.

Бағдарлама екі бағытта жүзеге асады:

1. Оқытушылардың біліктілігін арттыру.

MIT-тің Train-the-Trainer бағдарламасы AITU мұғалімдеріне сол жерде оқып, MIT тәсілдерін толық меңгеруге жол ашады. Алғашқы топ 2026 жылғы қаңтарда АҚШ-та оқуға аттанады. Жыл бойы олар GLEEN онлайн-сабақтарына қатысады, ал жазда MIT базасында өтетін стратегиялық воркшопта халықаралық мамандармен бірге AITU стартап-экожүйесінің болашақ жоспарын жасайды.

2. Студенттердің практикалық дағдыларын дамыту.

AITU студенттері жыл сайын StartMIT инновациялық интенсивіне қатыса алады. Сонымен бірге MIT Orbit және Jetpack AI платформаларына толық қолжетімділік алады. Бұл жүйелер студенттерге бизнес моделін жасау, гипотезаларды тексеру, өнімнің құнды ұсынысын әзірлеу секілді стартапқа қажетті нақты дағдыларды үйретеді. Кәсіпкерлік университеттің барлық студенті үшін қолжетімді негізгі құзыретке айналады.

Astana IT University ректоры Әлтайыр Ахметов бұл серіктестіктің ұлттық деңгейдегі маңызын атап өтті:

«GLEEN MIT бағдарламасына қосылу – еліміз үшін жаңа мүмкіндіктер ашады. AITU жаһандық білім және инновация қозғалысына қосылып, әлемдік деңгейде бәсекеге қабілетті стартаптар дайындайтын орталыққа айналады», деді ол.

MIT-пен әріптестік AITU-дың халықаралық беделін арттырып, зерттеу, жаңа технологиялар және инвестициялар бағытында кең мүмкіндіктер ашады. Университет Қазақстан мен Орталық Азиядағы инновациялық дамудың маңызды драйверіне айналып келеді.