Астана маңындағы жол апатынан Германиядан келген ерлі зайыптылар қаза тапты

10 тамызда Астана – Петропавл тасжолының 97-шақырымында орын алған Ақмола облысындағы жол-көлік оқиғасынан Германиядан келген ерлі-зайыпты қаза тапты. Апаттың мән-жайын облыстық полиция департаменті хабарлады, деп хабарлайды Tengrinews.kz sinegor.kz порталына сілтеме жасап.

Бұған дейін Астана маңында Mercedes-Benz Sprinter және ГАЗ-53 автокөліктері соқтығысқаны хабарланды. Жол апаты салдарынан Mercedes-Benz Sprinter көлігінің екі жолаушысы мерт болды. Сондай-ақ осы көліктің тағы жеті жолаушысы мен ГАЗ-53 көлігінің бір жолаушысы түрлі жарақаттар алып, медициналық мекемеге жеткізілді.

Қаза тапқандардың арасында ерлі-зайыпты Германия азаматтары болғаны анықталған. Ер адам алдыңғы жолаушылар орындығында отырған. Оның денесін құтқарушыларға көліктен шығарып алуға тура келді. Әйел адам алған көптеген жарақатынан ауруханада көз жұмған. Олардың тоғыз жасар қызы аман қалды, ол жарақат алып, ауруханаға жатқызылды.

Апат дерегі бойынша сотқа дейінгі тергеу амалдары жүргізіліп жатыр. Mercedes-Benz Sprinter жүргізушісі ұсталып, уақытша ұстау изоляторына қамалды. Тергеу нәтижелері бойынша процесуалдық шешім қабылданады.

Google News арқылы жаңалықтарымызды қадағалаңыз