Астана тұрғыны айыппұл тұрағы үшін мәжбүрлі түрде артық төлем жасағанына шағымданды

Tengri Auto редакциясына өз автокөлігін айыптұрақтан шығару кезінде қиындыққа тап болған оқырман хабарласты.

Tengri Auto редакциясына өз автокөлігін айыптұрақтан шығару кезінде қиындыққа тап болған оқырман хабарласты.

Хабарламаға қатысты мәселелер

Астана тұрғынының айтуынша, оның көлігі алдын ала ешқандай ескертусіз эвакуацияланған. Көлігі жоқ екенін байқаған кезде оның ұялы телефонына да, eGov-та да ешқандай хабарлама келмеген.

Демалыс күні көлікті алып шығу мүмкін емес

Автокөліктің қайда екенін тек 109 нөміріне қоңырау шалып білген. Ол айыптұрақта болған. Тұраққа барған кезде иесі көлікті тек әкімшілік полиция қызметкерлерінің қатысуымен, яғни жұмыс уақытында ғана қайтарып алуға болатынын білген.

Оқырманның айтуынша, жүргізушілер көліктерін айыптұрақтан жедел алып кете алмайтын жағдай қалыптасқан. Мысалы, көлік сенбі күні эвакуацияланып, иесі оны сол күні алып үлгермесе, автокөлік дүйсенбіге дейін тұрақта болады.

Бұл ретте көлік тұрғаны үшін ақы бүкіл кезеңге есептеледі.

Мемлекеттік органдар бұған не дейді?

Біз пікір алу үшін полицияға жүгіндік, онда сауалды Астана Жол қозғалысын ұйымдастыру орталығына (ЖҚҰО) бағыттады.

Ондағылар көлік иесіне эвакуация туралы алдын ала немесе кейін хабарлау, соның ішінде мемлекеттік ақпараттық жүйелер арқылы хабарлау ЖҚҰО құзыретіне кірмейтінін, оны әкімшілік іс жүргізу аясында әкімшілік полиция басқармасының қызметкерлері жүзеге асыратынын айтты.

Сонымен қатар ЖҚҰО ережеде көлікті полиция қызметкерлерінің қатысуынсыз, өз бетінше алып кету мүмкіндігі жазылғанын айтты.

"Ережеде көлік құралдарын мамандандырылған тұрақтардан беру тәулік бойы жүзеге асырылатыны белгіленген. Полиция қызметкерлері рәсімдеген қажетті құжаттар болған жағдайда, көлік иесі автокөлікті тәулік бойы, соның ішінде демалыс пен мереке күндері де алуға құқылы", - деп хабарлады ведомство.

Мәселе неде?

ЖҚҰО өкілдері көлікті қайтару үшін қажет құжаттарды тек әкімшілік полиция қызметкерлерінен алуға болатынын түсіндірді. Бұл жерде олардың жұмыс кестесін ескеру қажет.

"ЖҚҰО әкімшілік полиция қызметкерлерінің жұмыс кестесін анықтамайды және олардың әкімшілік материалдар мен көлік құралдарын қайтаруға қажетті құжаттарды рәсімдеу бойынша функцияларын жүзеге асыруға құқылы емес", - деді орталық өкілдері.

Процесс онлайнға ауыстырылады

ЖҚҰО өкілдері қазір жаңа жүйелерді интеграциялау бойынша жұмыс жүргізіліп жатқанын, бұл көліктерді айыптұрақтан полиция қызметкерлерінің міндетті физикалық қатысуынсыз, тәулік бойы алып кетуге мүмкіндік беретінін айтты.

"Бұл интеграцияны іске асыру мәліметтермен жедел алмасуды қамтамасыз етуге, көлік құралдарын қайтару процесінің жекелеген кезеңдерін автоматтандыруға және полиция қызметкерлерінің мамандандырылған тұрақта міндетті түрде болуынсыз көліктерді тәулік бойы беру мүмкіндігін жасауға жол ашады. Соның ішінде азаматтарды автокөліктің орналасқан жері туралы жедел ақпараттандыруды, процедураның ашықтығын арттыруды және көлік құралын қайтару уақытын қысқартуды қамтамасыз етеді", - деді ЖҚҰО өкілдері.

Еске сала кетейік, Астанада эвакуация мен көлікті айыптұраққа қою ақылы болды.

Қазіргі уақытта елордада келесі тарифтер қолданылады:

эвакуация - 12 975 теңге (3 АЕК) құрайды, көлікті тұраққа қою ақысы бөлек төленеді.

Бұған дейін билік айып тұрағында көлік қойғаны үшін сараланған тариф енгізуді жоспарлаған болатын:

эвакуацияланған сәттен бастап 3 сағатқа дейін - тегін; алғашқы тәулік - 1,5-тен 5 АЕК-ке дейін (2026 жылы шамамен 6 487-ден 21 625 теңгеге дейін); бұдан әрі құны өсуі мүмкін - 2-7 АЕК-ке дейін (2026 жылы 8 650-ден 30 275 теңгеге дейін).

Тағы оқыңыз: “Қатесіз өтсем де, қайта тапсыруға жіберді“: астаналық көлік жүргізу бойынша емтиханға шағымданды

Google News арқылы жаңалықтарымызды қадағалаңыз

Жазылу