Астанада 6 сынып оқушысы төрт тілде 850 ден аса кітап оқыған

Алтынай Өтеубаева қазақ, ағылшын, француз тіліндегі кітаптарды еркін оқиды. Алтынай төрт жастан кітапқа қызыққан. Әсіресе шытырман оқиғаға негізделген шығармаларды таңдап, талғап мазмұндайтын. 

Айта кеткен жөн, білім-ғылымға әуес, шығармашыл жас буынды қолдауға Президент те айрықша мән беріп отыр. Жақында ғана жарияланған мақаласында Мемлекет басшысы өскелең ұрпақ елдің ертеңгі тірегі екені тағы тілге тиек етті. 

Кітапқұмар қаршадай қыз Астанадағы №17 мектеп-гимназиясының оқушысы.  Небәрі 11 жастағы Алтынай бүгінге дейін төрт тілде 853 кітап оқып үлгерген. Қазақ, орыс, ағылшын және француз тілдеріндегі шығармаларды еркін мазмұндайды. Әсіресе шытырман оқиғаларға негізделген туындылар қызықтыратын көрінеді. Шет тіліндегі кітаптарды Алтынайға ата-анасы арнайы Ұлыбританиядан алдырады екен.

Алтынай Өтеубаева, №17 мектеп-гимназиясының 6-сынып:

- Менің ойымша, мен бір жылда 150 кітаптай оқи аламын. Кейбір кездері одан да асып кетеді. Бір кітапты бірнеше сағатта бітіре аламын. Кейде блокнотқа алып жазамын. Ол жерде кейіпкерлер басында қалай басталғанын, сосын соңында қалай аяқталды. Немесе ұнап қалған сөздер болса, түртіп аламын. 

Алтынайдың алғаш талабын таныған әжесі мен жақындары. Төрт жасында әріп танып, оқуға машықтанған баланың қабілетіне олар да қуанған. Кітапқұмар қыздың бұл дарыны бүгінде бауырлары мен сыныптастарына үлгі. 

Шапира Байгелдинова, №17 мектеп-гимназиясының кітапхана меңгерушісі: 

- Алтынай ең бірінші келгені 2024 жылы балалармен келетін. Бір күні бір кітапты алды, ертесі соны алып келіп тұр. Алтынай сен оқып болдың ба деп сұрасам, «иә, оқыдым» деді. Сосын мазмұнын айтып берді. Күнде солай бір-бір кітаптан алып жүрді. Кейін бір күні: «Апай, мен 4-5 кітаптан алайыншы», - дейтін болды. 

Алтынай секілді талантты жастар қатары көп. Былтыр қазақстандық оқушылар әлемдік олимпиадалар мен ғылыми жарыстарда 1006 медаль жеңіп алып, нағыз рекорд орнатты. Білім бәйгесінде елдің атын шығарып, абыройымызды асқақтатып жүрген оларға артылған сенім зор. Жалпы Қазақстанда білімді өрендерді қолдаудың жүйелі бағдарламасы жүзеге асырылып келеді. 2029 жылға дейін мемлекеттік жастар саясаты тұжырымдамасы әзірленген. Маңызды құжат жеті бағытты қамтиды. Ол әр жастың білім алуына, мәдени және қоғамдық өмірге белсенді араласуына мүмкіндік беретін кешенді бастамаға негізделген. 

Ақұлан Тастемір, ҚР Мәдениет және ақпарат министрлігі жастар және Отбасы істері комитетінің басқарма басшысы:

- Әрбір облыс әкімдіктерінде басқармалар бар жастар саясаты мәселелері басқармасы. Мұндай басқарма елдің алты өңірінде бар. 230-ға жуық жастар ресурстық орталықтарымыз бар. Бұл жастармен тікелей байланысатын, есігін қағып сауалын қоятын мәселесін шешуге бүкіл салаларға жауап беретін 3000-нан аса қызметкер бар. 

Жастар –  бүгінде ел халқының үштен бірін құрайды. Жаңа идеялар мен жаңашылдықтың, шығармашылық пен дамудың қайнар көзі. Олар заманауи технологияларды игеріп, инновациялық стартаптар құрып, халықаралық олимпиадаларда жеңіске жетіп, ерікті қозғалыстарға белсене араласып жатыр. Оқуда озат, өнерде өрелі, спортта сайыпқыран буынның қалыптасуына мемлекет қолдауы айрықша. 

Авторы: Кәмшат Мұхамеджан