Астанада Түркі әлемінің өнер фестивалі басталды

Астанада алғаш рет «Әлем әуені» халықаралық өнер фестивалі өтіп жатыр. Шарада түркі әлемінің мәдени мұрасы насихатталып, бауырлас халықтардың дәстүрлі өнері дәріптеледі. 

«Әлем әуені». Бұл – тарихы тамырлас, ағайыны бауырлас түркі әлемінің руханиятын біріктіретін алаң. Фестивальде туысқан халықтардың өнерпаздары ән шырқап, күй төгеді. Ал ғалымдар мен шеберлер тәжірибе алмасады. Таңертеңгі басқосуда музыкалық аспаптарды жасаудың қыр-сыры талқыланды. Дәстүрлі жолдары мен заманауи шешімдер қаралды. 

Ақтоты Райымқұлова, Түркі мәдениеті және мұрасы қорының президенті:

- Түркі дүниесінің шеберлерін, ғалымдарын бір осындай дөңгелек үстелге жинағанымыз әрине, біздің түркі әлеміне ерекше маңызды шара болғанын атап өткім келеді. Түркі дүниесі болып бәріміз біртұтас болумыз керек.

Әрі қарай сол аспаптарды жасауға арналған шеберлік сабақтар өтеді. Отандық һәм шетелдік ұсталар қатысқан жиында ағаш пен теріні өңдеу, ішек орнату, дыбыстың акустикалық сапасын жетілдіру көрсетіледі. 

Азамат Бақия, Астана қаласы өнер мұражайының негізін қалаушы:

- Бұл - қазақтың музыкалық аспаптарының түркі дүниесімен байланысуы деп білуге болады. Аспап жаңғырту саласында түркі дүниесімен санасу ең басты қағидамыз. Қорымызда 1600-ден астам музыкалық аспап сақтаулы.

Жиынға қатысушылар қазақтың музыкалық аспаптарын жасайтын ғылыми-зертханалық шеберхана жасау туралы ұсыныс білдірді. Мамандар бұл бастаманы қолдап отыр. Ал фестиваль ертең қорытындыланады. Жастар сарайында гала-концерт өтеді. Ұйымдастырушылардың айтуынша, бұл кеш – ортақ мәдени құндылықты қазіргі сахналық форматқа икемдеп, жаңа болмысын ашады.

Авторы: Бекзат Аманов