Астанадағы Қазмедиа орталығында Neo Aqjaima көрмесі өтіп жатыр

Қатерлі ісік ауруын жеңуге болады.

Оған дәлел «Нео Ақжайма» фотокөрмесіндегі суреттерде бейнеленген адамдар. Бұған дейін Астана әуежайында таныстырылған белгілі фотосуретші Оспан Әлінің туындылары бұл жолы Қазмедиа орталығына қойылды. Фотограф өзінің материалдары арқылы онкологиямен бет-бет келіп, кейін одан айығып кеткендердің ішкі арпалысы мен жеңіске деген сенімін жеткізе білген. Көрмеге қойылған әр суреттің астында кейіпкерлер жайлы ақпарат жазылған. Автор алдағы уақытта өңірлерді аралап, өмірдің қиын сәтін өткеріп жатқан азаматтарға фотокөрме арқылы мотивация беруді көздейді.

Оспан Әлі, фотосуретші:

- Онкология жаман ауруының жеңімпаздары. Солардың өмірлік тарихы арқылы өз ақжаймамызға үңілсек деген. Жалпы әр кейіпкердің диагнозын естіген сәттен бастап, өмірлерінің сәттерімен бөліскен кезде әркім өзіне керегін алады.

Жанат Аюпова, "Neo Aqjaima" жобасына қатысушы:

- Өзім үшін мақтанамын, өзім осыншалықты мықты адам, мықты ана, мықты жан екеніме. Қаншама адам қазір ауырып жатыр, өмірден түңіліп, өмірден қол үзіп жатрымын десем болады. Мен біріншіден қуанамын, мен тірі үлгімін. Таразда ауырып жатқан кісілер бар, Алматыда, Ақтауда кісілер маған жазып сіз бізге мотивация болдыңыз дейді.   

Мамандардың айтуына қарағанда, қазір елдегі онко-патологиялар арасында сүт безінің қатерлі ісігі бірінші орында тұр. Ал өлім-жітім құрылымында өкпе онкологиясы көш бастаған. Дәрігерлер осы «Нео Ақжайма» жобасы азаматтарға тек мотивация емес, денсаулық қадірін ұғындыратын бастама болады, дейді.

Лаура Баратова, онколог:

- Жалпы жылына клиникамызда мыңға жуық пациентті қабылдай аламыз. Ол науқастар әрі қарай өмірлік диспансерлік тіркеуде клиникада тұрады, әрі қарай ем алып жалғастырады. Онкологияның алдын алу мақсатында чек-ап қарастырылған. Сол чек-ап өту арқылы 300-ден астам адам өтті. Соның ішінде 50-ден артық адам онкологияның алдынғы жағдайы анықталды.