Атқа байлап, сүйреген... : әйелін қатыгездікпен өлтірген адамның ісі сотқа жетті

Жетісу облысында 32 жастағы Айзат Жұманованы азаптап өлтірді деп айыпталған күйеуінің ісі сотқа жетті, – деп хабарлайды Aikyn.kz сайты Информбюро 31-ге сілтеме жасап.

Атпалдай азаматтың ішімдікке сылқия тойып алып, жұбайын асқан қатыгездікпен ажал құштырғаны тергеу барысында дәлелденіпті. Прокурордың мәліметінше, айыпталушының қанды қылмысқа баруына қызғаныш себеп болған. Айта кетейік, бұған дейін марқұмның туыстары қаскөй әйелді атпен сүйреп қинағанын айтқан еді.

Қоғамды дүр сілкіндірген қылмыстың жай-жапсарынан аза бойың қаза болады. Прокурордың айтуынша, 33 жастағы азамат әйелінің телефон арқылы бөтен адаммен сөйлескенін көріп қызғаныш сезімі оянған. Осылайша, ішімдікке сылқия тойып алып, Айзат Жұманованы есінен танғанша соққыға жыққан. Айғайлап көмек сұрағанына қармастан келіншекті жұдырықтауын тоқтатпаған екен. Бұл қылмысқа екіге толмаған кішкентай қыз куә болыпты.         

- Ашуланған Айбар Жанболат мотоциклге отырып, Суықсай ауылындағы дүкенге барып, 7-8 бөтелке сыра сатып алған. Жол бойы сатып алған сыраны ішкен. Үйге келген соң Жұманованың белгісіз біреумен телефон арқылы сөйлесіп жүргені есіне түсіп, қызғаныш сезімі оянып, әйелін өлтіруді ойлаған,-дейді Жетісу облыстық прокуратурасының прокуроры Нұрлан Билібеков.

Жалпы, ерлі-зайыптының арасы суып кеткен екен. Олар бір-бірінің телефонын сындырып, 15 күн байланыссыз жүрген. Осы уақыт аралығында өзара сөйлеспеген дейді мемлекеттік айыптаушы. Ал, әйелді атпен сүйреді деген туыстарының болжамы тергеу барысында расталмады. Сондай-ақ, жәбірленуші тараптың наразылығынан кейін мәйітке эксгумация жасалып, нәтижесінде қылмыс “қасақана өлтіру” дерегіне ауысыпты.

-Белгілері болғандықтан, жараларына қарадық. Жаңағы бастың арасындағы шөп, қоқым. Соған қарап біз оны атқа сүйреп өлтірді дегенбіз. Ол мойындаған жоқ. Ол енді мойындасын, мойындамасын әркімнің конституциялық құқығы. Бірақ біз енді оны дәлелдеп осы уақытқа дейін келдік. Біздің қорғаушыларымыздың арқасында, резонанстың арқасында біздің ісіміз 99-бап, 1-бөлігіне алып келді,-дейді марқұмның туысы Раушан Дәуренбекова.

Қара жамылған отбасы айыпталушының қолымен жасағанын мойнымен көтере алмағанына қапалы. Олар кінәлі адамның қатаң жазаланғанын қалайды. Айта кетейік, қанды оқиға шілде айында болған. Жақындары Айзат Жұманованың мәйітін көрсетіп, күйеуі асқан қатыгездікпен өлтіргенін көрсеткен болатын. 32 жасында көз жұмған келіншек үш жыл бұрын тұрмысқа шыққан екен. Артында екі жасар қызы қалды.