Атырау облысының экономикасы 14,7% өсім көрсетті

Атырау облысында 2025 жылдың қаңтар-қазан айларында әлеуметтік-экономикалық көрсеткіштердің басым бөлігі бойынша өсім байқалды.

Бұл туралы Өңірлік коммуникациялар қызметінде өткен брифингте Ұлттық статистика бюросының облыстық департамент басшысы Нұржан Құмарғалиев мәлімдеді.

Облыстың жалпы өңірлік өнімі ұлғайып, экономиканың негізгі драйвері саналатын өнеркәсіп саласы айтарлықтай нәтижеге қол жеткізді. Мұнай-газ секторындағы өндіріс те жоғары қарқынмен жалғасуда: жыл басынан бері 52 млн тоннадан астам мұнай және 29 млрд текше метр газ өндірілген. Өнеркәсіп көлемі былтырғы кезеңмен салыстырғанда 18,6%-ға артқан. Электр және жылу өндіру салалары да өсім көрсеткен.

Ауыл шаруашылығы саласында да оң динамика байқалады. 10 айда өндірілген өнім көлемі 117 млрд теңгеге жетті. Құс шаруашылығы қарқын алып, жұмыртқа өндірісі екі есеге жуық көбейген. Мал басы мен егіс алқаптары да ұлғайған.

– Экономикадағы бұл өсім бірнеше саланың қатар дамуының нәтижесі. Ауыл шаруашылығы, өнеркәсіп, сауда және көлік секторларындағы көрсеткіштер өңірдің тұрақты дамуын көрсетіп отыр, – деді Құмарғалиев.

Дегенмен құрылыс саласында аздаған төмендеу тіркелді. Бұл ірі жобалардың аяқталуына байланысты екені атап өтілді. Соған қарамастан, тұрғын үй құрылысы жалғасып, 558 мың шаршы метрден астам баспана пайдалануға берілді.

Өңірге тартылған инвестициялар көлемі 1,2 трлн теңгені құраған. Қаражаттың басым бөлігі өнеркәсіп пен көлік инфрақұрылымын дамытуға бағытталған. Сауда саласында да өсім сақталып, бөлшек сауда айналымы 504 млрд теңгеге жетті.

Көлік саласында жүк тасымалы артқан, жолаушылар саны да 13,6%-ға көбейген. Байланыс секторында интернет пен цифрлық қызметтерді пайдалану кеңейіп келеді.

Туризм саласы да жанданып, өңірге келген туристер саны жыл басынан бері 18%-ға өскен.

Облыс халқы 714 мың адамға жеткенімен, биыл туу көрсеткіші сәл төмендеген. Көші-қон бойынша аймақтан сыртқа көшушілердің саны келушілерден көбірек.

Баға өсімі негізінен азық-түлік тауарларында байқалған. Әсіресе ет пен жұмыртқа инфляцияның негізгі факторына айналған.

Брифинг соңында департамент басшысы Ұлттық ауыл шаруашылығы санағының өңірде толық аяқталғанын айтып, алдын ала нәтижелер жыл соңына дейін жарияланатынын жеткізді.

Бүгін, 16:55