Атырау онкодиспансерінде маммография кезіндегі бейнебақылау пациенттердің наразылығын туғызды

Маммографиядан өткен әйелдер кабинетке орнатылған бейнекамераға байланысты өздерін жайсыз әрі қорғансыз сезінгендерін айтты. Пациенттердің сөзінше, оларды алдын ала бейнежазба бар екендігі жөнінде хабардар етпеген және оған кімнің, қандай негізде қол жеткізе алатынын түсіндірмеген.

Әйелдер маммографияны сезімтал медициналық процедураға жататынын атап өтті. Сондықтан тексеру кезінде бейнебақылаудың болуының өзі стресс тудырып, медициналық мекемеге деген сенімді әлсіретеді.

Осыған байланысты Атырау облыстық онкология диспансерінің әкімшілігі ресми түсініктеме беріп, бейнебақылау жүйесін орнату мақсатын және оған қол жеткізу тәртібін түсіндірді.

«Маммография кабинетіне бейнебақылау жүйесі қауіпсіздік талаптарына және жоғары технологиялық медициналық жабдықты пайдалану жөніндегі техникалық регламенттерге сәйкес орнатылды. Жүйе жабық контурда жұмыс істейді және медициналық ұйымның ортақ желісіне қосылмаған. Медициналық және техникалық қызметкерлер мониторға немесе бейнежазба архивіне қол жеткізе алмайды, сондықтан процедура кезінде пациентті көрмейді», — деп хабарлады диспансер.

Мекемеде жүйеге қол жеткізу қатаң шектелгені де атап өтілді.

«Қауіпсіздік жөніндегі ішкі бұйрыққа сәйкес, жүйеге қол жеткізу және бейнежазбаларды қарау құқығы тек аурухана директорына ғана берілген. Видеотіркеу қымбат мемлекеттік мүлік — маммографиялық аппараттың сақталуын қамтамасыз ету, сондай-ақ даулы медициналық жағдайлар туындаған кезде пациенттердің құқықтарын қорғау үшін жүргізіледі», — деп түсіндірді диспансер.

Медициналық мекемеде барлық деректердің қорғалғаны жеке атап өтілді.

«Ақпарат қорғалған серверде шифрланған түрде сақталады және Қазақстан Республикасының заңнамасында белгіленген мерзім өткен соң автоматты түрде жойылады. Әкімшілік медициналық құпияның сақталуына, сондай-ақ пациенттердің ар-намысы мен қадір-қасиетінің қорғалуына кепілдік береді», — делінген ресми жауапта.

Ал пациент әйелдерде «интимді медициналық тексеру жүргізілетін кабинетке камера орнату қаншалықты орынды және мұндай бейнебақылау әйелдердің жеке келісімінсіз жүзеге асырылуы тиіс пе?» деген сұрақ туындап отыр.

Айгүл МАНСУРОВА

Бүгін, 12:56