Атырау Орал трассасындағы айналма қара жолдың ала шаңынан дым көрінбейді

«АЖ» редакциясына Атырау — Орал трассасының жөнделіп жатқан учаскесінен видео түскеннен кейін, мердігер ұйым уақытша айналма жолда қатты шаң көтерілу себебін түсіндіріп, қандай шаралар қолданылып жатқанын айтты.

12 шілдеде «АЖ» редакциясына республикалық маңызы бар Атырау — Орал жолының жөндеу жұмыстары жүріп жатқан учаскесінде түсірілген видео келіп түсті. Кадрлардан жүк көліктері мен жеңіл машиналардың уақытша айналма жолмен жүріп бара жатқаны көрінеді. Көліктердің артынан көтерілген шаңның қоюлығы соншалық, қарсы келе жатқан көліктер бірнеше секундқа мүлдем көрінбей қалады.

«ҚазАвтоЖол» АҚ Атырау филиалы «АБК-Автодор НС» ЖШС-нің техникалық директоры Ермек Едігеновтің мәліметін жолдады. Оның айтуынша, көліктің қозғалысы көбейгені мен қолайсыз ауа райы, соның ішінде жауын-шашынның көп болуы салдарынан уақытша айналма жолдың жағдайы нашарлап кеткен.

Компания қазіргі уақытта бұл учаскеде айналма жолды тұрақты күтіп ұстау жұмыстары ұйымдастырылғанын хабарлады. Шаңды басу үшін жолға жүйелі түрде су себіліп, автогрейдермен тегістеу жұмыстары жүргізіліп, сондай-ақ жол катокпен тығыздалып, қажет болған жағдайда пайда болған ақаулар шұғыл түрде жойылып жатыр.

Мердігер компания түсініктемемен бірге редакцияға жұмыс орнынан түсірілген фотосуреттерді де жіберді. Суреттерден уақытша айналма жолда су себетін машина мен автогрейдердің жұмыс істеп жатқанын көруге болады.

«АБК-Автодор НС» ЖШС уақытша айналма жолдың жағдайы инженерлік-техникалық қызметкерлердің тұрақты бақылауында екенін сендіріп, жүргізушілерден жөндеу жұмыстарына байланысты туындаған уақытша қолайсыздықтар үшін кешірім сұрады.

Ләззат ҚАРАЖАНОВА

Бүгін, 11:00