Атырау тұрғындары өртке қарсы датчиктерге қызығушылық танытуда

Соңғы кездері түтін мен газдан уланып қалу оқиғалары тұрғындарды өз үйлерінің қауіпсіздігін қайта қарауға мәжбүр етті. Көптеген тұрғындар апаттың алдын алатын қарапайым шешім іздеп, назарын шағын дабыл датчиктеріне аударуда.

Елімізде тұрғын үйлерде иіс тию, түтінге немесе газға уланып қалу жағдайлары жиілеп кетті. Әсіресе қыста пеш, газ құрылғылары жиі қолданылатындықтан, қауіп те арта түседі. Тек Атырау облысының өзінде жыл басынан бері тұрғын үй секторында 158 өрт тіркелген. Осындай оқиғалардан кейін көпшілік өз үйіндегі қауіпсіздікті қайта қарастыра бастады. 

Атырау тұрғыны зардап шеккендер туралы жаңалықтарды оқығаннан кейін алғаш рет датчик орнату жайлы шындап ойланғанын айтады.

Қайда жүгіну керек және құрылғыны қалай дұрыс орнату қажет?

Дабыл датчигі түтінге, температура күрт көтерілсе немесе газ кетсе, бірден әрекет етеді. Ол қауіпті сезген сәтте қатты дыбыс шығарып, үй ішіндегілерге бірден ескертеді. Дәл осы бірнеше секунд шешуші болуы мүмкін.

Қазір нарықта түтінді анықтайтын, тұрмыстық газдың және улы газдың шығып жатқанын сезетін бірнеше түрі бар. Құтқарушылар, мүмкін болса, осы үшеуін де орнатуға кеңес береді. Әсіресе газбен жылынатын, пеші бар немесе ескі үйлерге.

Мұндай құрылғылар құрылыс дүкендерінде, гипермаркеттерде және онлайн сатылымда бар. Түрлеріне байланысты бағалары 3 мың теңгеден басталады және одан жоғары.

Датчикті орнатуды лицензиясы бар компанияларға да тапсыруға болады. Олар құрылғыны таңдап, орнатып, жұмысын тексереді. Қызмет құны әдетте бес мың мен он бес мың теңге аралығында.

Құрылғыны өзіңіз де орната аласыз. Көптеген құрылғылар батареямен жұмыс істейді және төбеге немесе қабырғаға оңай бекітіледі. ТЖД мамандары датчиктерді жатын бөлмелерге, дәліздерге, ас үйге (газ датчигі), пеш орналасқан аймаққа (ауа айналымын ескере отырып) орнатуды ұсынады.

Осал топтарға тегін орнатылады

Әлеуметтік тұрғыдан осал отбасылар үшін арнайы тегін орнату бағдарламасы бар. Атырау облысы ТЖД бас маманы Бекзада Тәжібаева түсіндіргендей, мұндай отбасылардың тізімін әкімдік береді. Құтқарушылар мекенжайларға барып, түсіндіру жұмыстарын жүргізіп, датчиктерді демеушілер мен еріктілер көмегімен орнатып береді.

Кеңес алу үшін 112 нөміріне хабарласуға болады. Лицензиясы бар компанияларды интернеттен іздеу арқылы оңай табуға болады. Ал құрылыс дүкендеріндегі кеңесшілер сізге қолайлы үлгіні таңдауға көмектеседі.

Жиілеп кеткен оқиғалар қауіпсіздік шараларын кейінге қалдыруға болмайтынын көрсетіп отыр. Бүгін орнатылған шағын құрылғы ертең үлкен апаттың алдын алуы мүмкін.

Гүлжанат ИСАБАЕВА

Бүгін, 13:49