Атырауда үш ​даулы жағдай тұтынушылардың пайдасына шешілді

Атырау облысының Тұтынушылардың құқықтарын қорғау департаментіне түскен шағымдарға сүйенсек, егер техника ақаулы болса, жарнама жаңылыстырса немесе қызмет сапасыз орындалса, ақшаңызды қайтарып алуға болады.

Смартфон екі күнде істен шықты

Қала тұрғыны жаңа смартфон сатып алғанымен, екі күннен кейін ол өздігінен өшіп, қуаты ұстамай қалған. Дүкен «телефон пайдаланылған» деген себеппен тауарды ауыстырудан бас тартқан. Тұтынушы департаментке жүгініп, «Тұтынушылардың құқықтарын қорғау туралы» заңның 30-бабына сәйкес, сапасыз тауар үшін ақшасын қайтаруға құқылы екенін дәлелдеді. Нәтижесінде 365 000 теңге қайтарылған.

«50% жеңілдік» шындыққа жанаспады

Қала тұрғыны «Барлық тауарға 50% дейін жеңілдік» деген акцияны көріп, киім сатып алмақ болған. Алайда кассада жеңілдік тек шектеулі үлгілерге ғана қолданылатыны анықталды. Әйел 139 мың теңгені толық төлеп қойған. Жарнама заң талаптарына сай болмағандықтан, дүкен артық төленген соманы қайтарып берді.

Жөндеу жұмыстары сапасыз болды

Қала тұрғыны пәтерін жөндеуге шеберлерді жалдаған. Жұмыс аяқталған соң қабырғаларда жарықтар пайда болып, бояудың түсі өзгеріп кеткен. Мердігер кемшіліктерді түзетуден бас тартқан. Департаментке шағымданғаннан кейін тараптар келісімге келіп, тапсырыс берушіге жөндеу құны толық өтелді.

Бұл оқиғалар заңның жұмыс істейтінін және үнсіз қалмай, өз құқығын қорғауға болатынын еске салады. Атырауда әрбір шағым әділ шешімін тауып, адамдарға тек қаржысын қайтарып қана қоймай, өз құқықтарын қорғауға деген сенімін де күшейтеді.

Егер сіз де осындай жағдайға тап болсаңыз, Атырау облысының Сауда және тұтынушылар құқықтарын қорғау департаментіне тікелей (Құрманғазы көшесі, 12Б, 3-қабат, 9–10 кабинет) немесе E-otinish.gov.kz және Egov.kz электронды порталдары арқылы жүгінуге болады. Чектерді, фото және бейнематериалдарды сақтап жүріңіз — бұл сіздің құқықтарыңызды жедел әрі тиімді қалпына келтіруге көмектеседі.

Гүлжанат ИСАБАЕВА

Бүгін, 18:13