Атырауда жалған стоматология ісі бойынша ұсталғандардың туыстары акция өткізді

Атыраудағы қалалық полиция басқармасы алдында үш айдан бері қамауда отырған тоғыз адамның туыстары жиналды. Олар таңдалған бұлтартпау шарасына қарсы шығып, жақындарын кінәсіз деп санайтынын мәлімдеді.

Сонымен бірге сотқа дейінгі тергеу материалдары бұл операцияларға қатысу тегін болмағанын көрсетеді. Қаржылық мониторинг агенттігінің (ҚМА) деректеріне сәйкес, сыйақы аударым сомасының шамамен он пайызын құраған, ал жекелеген операциялар ондаған миллион теңгеге жеткен.

Құқық қорғау органдарының мәліметінше, бұл іс бойынша ел көлемінде екі жүзден астам «дроппер» тергелуде. Ақша азаматтардың өздері аударғанымен, ол жалған медициналық құжаттар негізінде, стоматологиялық қызмет көрсетілмей жасалған.

Акцияға қатысушылардың арасында Ғаббас Иманбаевтың анасы Гүлмира Иманбаева да болды. Оның есімі бұған дейін Қаржылық мониторинг агенттігінің хабарламаларында аталған еді.

«Ұлымның стоматологиясы болған жоқ, оның фирмасы да, клиникасы да болған емес. Ол тек адамдарға ақшаларын алуға көмектесті. Біз арнайы сұрадық, іс бойынша зардап шеккендер мен арыздар жоқ. Егер ешқандай зардап шеккендер болмаса, неге менің балам СИЗО-да қылмыскер ретінде отыр?» — деді ол.

Гүлмира Иманбаеваның айтуынша, оның ұлы шетелде демалыста жүрген кезде іздеуге берілген, алайда ол тергеуден жасырынбаған. Отбасы оның іздеуде екенін әлеуметтік желілерден ғана білген. Анасының сөзінше, ұлы Атырауға оралған соң бірден әуежайда ұсталған. Оның пікірінше, егер жасырыну ниеті болса, ол елге өз еркімен қайтып келмес еді.

Қазан айында «жалған стоматология» ісінің үш қатысушысы — Ғаббас Иманбаев, Есімхан Елешев және Аслан Дүйсенов іздеуге жарияланған болатын. Қаржылық мониторинг агенттігінің деректеріне сәйкес, Атырау мен Ақтаудағы жеті жалған стоматологиялық клиника арқылы олардың көмегімен қырық миллиард теңгеден астам зейнетақы жинағы шығарылған.

Бұл істің контексті бір ғана өңірмен шектелмейді. Атырау облысы зейнетақы жинақтарын пайдалану бағдарламасы ең белсенді қолданылған үш өңірдің қатарына кірді. Ресми деректер бойынша: Алматыда – 161 692 өтінім (15,81 пайыз), Атырау облысында – 138 096 өтінім (13,5 пайыз), Маңғыстау облысында – 128 288 өтінім (12,54 пайыз) берілген.

Жалпы ел бойынша отыздан астам жалған стоматологиялық клиника арқылы 200 миллиард теңгеден астам зейнетақы жинағы заңсыз шығарылған.

Бұл жағдай қоғамда қарама-қайшы пікір туғызды. Біреулер «дропперлерді» алаяқ деп санамайды, өйткені адамдар өздері көмек сұрап, ешқандай шағым білдірмеген. Ал басқа топ — ең аз жинағы бар азаматтар шын мәнінде зардап шеккенін айтады, себебі олар қымбат стоматологиялық емді төлеудің жалғыз мүмкіндігінен айырылып отыр.

Акция барысында қатысушылар «Бостандық!» — «Свобода!» деп ұрандатты.

Қылмыстық іс қазіргі уақытта сотқа дейінгі тергеу сатысында тұр. Бұған дейін хабарланғандай, Денсаулық сақтау министрлігі стоматологиялық емге төлемдерді қайта бастау мәселесін қарастырмайтынын мәлімдеген.

Анастасия ШЕРСТЯНКИНА

Автордың видеосы

Бүгін, 18:15