Атыраудағы Ломоносов атындағы мектептің мұғалімдері президентке үндеу жасады

10 сәуірде мектеп директоры Динара Сақауованың бастамасымен ұстаздар ұжымы Қазақстан президентіне, сондай-ақ Атырау облысының әкімі Серік Шәпкеновке және Оқу-ағарту министрі Жұлдыз Сүлейменоваға үндеу жолдады.

Үндеуде директор жаңа мектепті салу мәселесін көтерген. Оның айтуынша, ескі ғимаратты бұзу туралы шешім 2022 жылы қабылданғанымен, төрт жыл ішінде бөлшектеу де, құрылыс та басталмаған. 

1936 жылы салынған мектеп ғимаратында бірнеше буын оқушылар білім алған. Қазір ұстаздар мен оқушылар өте күрделі жағдайда жұмыс істеуге мәжбүр.

Оқу процесі басқа мектептердің базасында ұйымдастырылған: бастауыш сыныптар Жангелдин атындағы мектепке, 5–11 сыныптар Макаш Бекмұхамбетов атындағы мектепке орналастырылған. Кітапхана мен бухгалтерия да бөлек ғимараттарда орналасқан. Осылайша, ұжым іс жүзінде төрт мектепке бөлініп кеткен.

Директордың айтуынша, мұндай жағдайда оқу процесін ұйымдастыру айтарлықтай қиындаған. 

— Қазіргі уақытта біз төрт мектепке бөлініп отырмыз. Оқу процесі үш ауысымда ұйымдастырылған, сыныптар шамадан тыс толы. Бар болғаны тоғыз кабинетте мыңнан астам оқушы оқиды. Барлық оқушыларды сыйғызу үшін сабақ ұзақтығын қысқартуға мәжбүрміз. Бұл білім сапасына, балалардың денсаулығына және мұғалімдердің еңбек жағдайына теріс әсер етуде, — дейді Сақауова.

Директор мектепті жабдықтау мәселесіне бөлек тоқталды.

— Мұғалімдер қай жерде мүмкін болса, сол жерде жұмыс істеуге мәжбүр, — дейді директор.

Оның айтуынша, бұған дейін билік мектептің жанындағы жер телімдерін мемлекет мұқтаждығына алу қажеттілігіне сілтеген, алайда бұл мәселе өткен жылдың соңында шешілген.

Мектеп ұжымы өз үндеуінде М. Ломоносов атындағы жаңа мектептің құрылысын жеделдетуді сұрады. «Ақ Жайық» облыс әкімдігінің баспасөз қызметіне және қалалық білім бөліміне пікір білдіруді сұрап жүгінді. Олар білім басқармасына сілтеме жасап, бірдей мәтінмен жауап берді.

«Қазіргі заманғы нормативтер мектеп учаскесінің аумағына оқу корпустарын, спорт алаңдарын, автотұрақтарды және басқа да инфрақұрылымды орналастыру үшін жоғары талаптар қояды. Осыған байланысты қала әкімдігі мемлекет мұқтаждықтары үшін жер телімдерін алу рәсімдерін бастады».

Бұл рәсім бірнеше кезеңнен тұрады және оған мүлікті бағалау, құқық иелерін хабардар ету, өтемақы төлеу, сондай-ақ кей жағдайларда дауларды сот арқылы реттеу кіреді. Заңда көзделген барлық кезеңдерді сақтау дайындық жұмыстарының мерзімін ұзартып жіберді.

Барлық заңдық рәсімдер аяқталғаннан кейін Ломоносов атындағы мектептің орнына 900 орындық жаңа мектеп салынбақ. Жоба-сметалық құжаттама толық дайындалып, мемлекеттік сараптамаға жіберілді.

Айнұр САПАРОВА

Бүгін, 13:49