Атыраудағы жоғалған отбасы ісі: күдіктілерді қамауға алу сәті жарияланды

Атырау облысында бір отбасының өліміне қатысты күдіктілердің ұсталу сәтінен кадрлар пайда болды, – деп хабарлайды Aikyn.kz сайты.

Еске салайық, Қазақстан Республикасы Ішкі істер министрлігінің қызметкерлері шетелдік әріптестерімен бірлесіп жүргізген жедел іс-шаралар нәтижесінде Индонезия Республикасының Ломбок аралындағы Сенару ауылында аса ауыр қылмыс жасады деген күдікке ілінген ер адамды ұстады. Оған ҚР Қылмыстық кодексінің 99-бабы 2-бөлігі («Адам өлтіру») бойынша айып тағылуда.

Күдіктімен бірге оның бұрын халықаралық іздеуде жүрген, хабар-ошарсыз кеткен деп танылған бұрынғы жұбайы да табылған. Қазіргі уақытта оған да күдікті мәртебесі берілді.

Тергеу деректеріне сәйкес, олар 2025 жылғы 14 желтоқсанда Куала-Лумпурдан ұшқан рейспен Бали арқылы Индонезия аумағына кірген.

Қазіргі уақытта аталған іс бойынша тергеу амалдары жалғасып жатыр.