Ауыл мектептері оқушыларының олимпиадасында 200 қатысушысы жеңімпаз атанды

Астанада ауыл мектептері оқушыларына арналған жаратылыстану-математикалық бағыттағы республикалық олимпиада өз мәресіне жетті. Қорытынды кезеңге еліміздің өңірлерінен 475 оқушы қатысып, олардың 200-і жеңімпаз және жүлдегер атанды, деп хабарлайды Egemen.kz.

Марапаттау рәсіміне Оқу-ағарту вице-министрі Майра Мелдебекова қатысты. Вице-министр өз сөзінде дарынды балаларды қолдау және адам капиталын дамыту мемлекеттің басты басымдықтарының бірі екенін атап өтті.

«Мемлекет адам капиталын дамыту мен дарынды балаларды қолдауға ерекше назар аударады. Ауыл мектептеріне арналған республикалық олимпиада – осы мақсаттарға қол жеткізудегі маңызды құралдың бірі. Интеллектуалдық сайыстарға қатысу терең білімді ғана емес, жоғары жауапкершілікті де талап етеді. Сіздер адал әрі тартысты бәсекеде өз білімдеріңізді дәлелдеп, үздік нәтижелерге қол жеткіздіңіздер. Үлкен жеңістеріңізбен құттықтаймын», деді вице-министр.

Биылғы олимпиадада 200 медаль сарапқа салынды: 36 алтын, 66 күміс және 98 қола. Командалық есеп бойынша Гран-при Маңғыстау облысының командасына табысталды.

«Үздік олимпиадалық команда» номинациясы бойынша I дәрежелі дипломды Алматы облысының құрамасы, II орынды Атырау және Ақмола облыстарының командалары, III дәрежелі дипломды Қызылорда және Батыс Қазақстан облыстарының командалары иеленді.

Жеңімпаздар еліміздің жетекші жоғары оқу орындарының бес ректорлық грантымен марапатталды. Оның ішінде: SDU – 2 грант, Satbayev University – 1 грант, Қарағанды техникалық университетінен – 2 грант.

Олимпиаданың қорытынды кезеңіне қатысқан барлық финалистер алдағы интеллектуалдық жарыстарға даярлау мақсатында «Дарын» республикалық сырттай мектебіне қабылданады. I дәрежелі диплом иегерлері 2026 жылғы наурыз айында өтетін республикалық олимпиаданың қорытынды кезеңіне қатысу мүмкіндігін алады.

Айта кетейік, ауыл мектептері оқушыларына арналған республикалық олимпиада жаратылыстану-математикалық және қоғамдық-гуманитарлық бағыттағы 13 пән бойынша төрт кезеңде ұйымдастырылды. 2025-2026 оқу жылында олимпиаданың мектеп кезеңіне 125 мың оқушы қатысқан. Финалға 1000-ға жуық қатысушы өтті, олардың 475-і жаратылыстану-математикалық бағыт бойынша сынға түсті. Қоғамдық-гуманитарлық бағыттағы олимпиада 9-14 желтоқсан күндері Астана қаласында өтеді.