Автолизинг бадарламасы: көлік сатып алу процесі жеңілдейді

Елде бүгіннен бастап автолизинг бағдарламасы іске қосылады, деп хабарлайды 24KZ. Енді көлік бағасы төмендеп, оны сатып алу процесі жеңілдейді. Лизингтің автонесиеден қандай айырмашылығы бар?

Автоны несиеге аламын деп бастапқы жарнаны жинауға уақыт жоғалтып алатындар бар. Кей азаматтардың басындағы түрлі жағдайға сәйкес қаржылық қиындықтар туындауы мүмкін. Бірақ енді автолизинг іске қосылады. Ол көлікті ұзақ мерзімге жалдап, кейін оны сатып алу немесе қайтару мүмкіндігін қарастыратын жүйе.

Олжас Құспеков, ҚР Парламенті Мәжілісінің депутаты:

- Эксклюзив ақпарат айтайын. Бастапқыда мөлшерлеме 45% деп бекітілді. Қазір автонесиенің өзі 45%. Біз оны 36%-ке дейін төмендеттік. Кейін автосалондармен, екінші деңгейлі банктермен, лизингтік компаниялармен кеңесіп, шекті мөлшерлемені 15%-ке түсіруді қарастырып отырмыз. Нарық бұл бағытқа көшуге дайын. Мемлекеттік органдар тарапынан да ұсыныстар болды.

Лизингтің автокредиттен нақты айырмашылығы сол, көлікті несиесіз әрі ұзақ мерзімге жалға аласыз. Алғашқы жарнаны төлеудің қажеті жоқ. Автокөлікті таңдаған соң лизинг компаниясы оны сатып алып, ай сайынғы төлемді бекітеді. Сөйтіп, сізге көлікті пайдалануға береді. Ақшасы толық төленбейінше темір тұлпар автолизинг компаниясының меншігінде болады. Халық мұндай жаңашылдықты жақсы қабылдап отыр.

Лизинг жұмыс істеп тұрған автонесие бағдарламасына қосымша мүмкіндік ретінде жүреді. Мамандардың айтуынша, бұл жүйе көлік алуды қолжетімді етіп, ішкі автонарықты, әсіресе елімізде шығарылатын көліктердің өндірісін қолдау мақсатында әзірленіп отыр.

Авторы: Альмира Оразбай