Аягөзде әкімдіктің әлеуметтік осал санаттағы отбасыларға берген пәтерін тұрғындар заңдастыра алмай жүр

Абай облысының Аягөз қаласында көпбалалы аналар, соғыс ардагерлері мен мемлекеттік қызметкерлерге арналған үйлердің тұрғындары жылдар бойы баспанасын жекешелендіре алмай келеді. Себебі бұл үйлердің жер телімдері заңсыз деп танылған, деп хабарлайды Аikyn.kz.

2023 жылы Абай облысы Аягөз қаласында мемлекеттік тұрғын үй бағдарламасы аясында бірқатар көпбалалы және әлеуметтік осал санаттағы отбасыларға пәтер берілген болатын. Алайда тұрғындардың айтуынша, құжаттарды рәсімдеу барысында бірқатар бюрократиялық кедергілер туындап, мәселе әлі күнге дейін шешілмей отыр.

- Олар үйлер салынған кезде жер актісі берілмеген, ал құрылыс басталарда рұқсат қағазы да рәсімделмеген. Салдарынан қазір ондаған отбасы құжатсыз қалып, өз үйлерін меншігіне айналдыра алмай отыр. Шенеуніктердің немқұрайлығынан қарапайым халық зардап шегіп отыр. Заң қабылданған сәттен бастап бірнеше айдан бері барлық есікті қағып, табалдырық тоздырдық. Бірақ еш нәтиже жоқ, – дейді олар.

Көпбалалы аналар «бұл мәселе бірнеше жылдан бері шешілмей келе жатыр» деп наразы. Олар мемлекет бағдарламасы аясында берілген үйлердің заңдық мәртебесін реттеуді сұрап, Президент Қасым-Жомарт Тоқаевқа ашық хат жолдап, көмек сұрады.