Балаңды орысша оқытпа, мәңгүрт болып қалады Алматыдағы мектеп дауы

Кеше, 28 қазанда Алматыда белсенділер мен ата-аналар №224 мектептің қазақ мектеп болуын талап етіп, әкімдікке тағы жиылды, деп хабарлайды Arasha.kz.

"Тіл кеспек жоқ" Telegram арнасының мәліметінше, әкімдік өкілдері белсенділер мен ата-аналарды азаматтарды қабылдау залына кіргізген. Ата-аналар мен белсенділердің алдына білім бөлімінің басшысы Сайран Тәпенұлы шыққан. Бостандық ауданында әлі ашылмаған жаңа №224 мектепке қатысты дау туындады. Бастапқыда қазақша оқытады деген мектеп енді "аралас" болып ашылуы мүмкін. Қазіргі уақытта ауданда бір ғана қазақ мектебі бар.

Жаңа мектептің қазақша болуын талап еткен ата-аналар ауданда қазақ мектебі тапшы екенін, жалғыз біреу ғана барын айтады. Онда бір сыныпта 35-40 баладан оқуға мәжбүр. Жаңа мектеп мемлекеттік "Жайлы мектеп" жобасы аясында салынған. Желідегі дерекке сүйенсек, Алматыдағы ең үлкен 2 мектептің бірі болмақ. 2500 оқушы орнына арналған.

Ал осы мәселе бойынша танымал баспагер Санжар Керімбай да Instagram желісіндегі ресми парақшасында өз пікірін білдірген еді.

"Балаңды орысшаға оқытпа. Мәңгүрт боп қалады. Мәңгүрт бишара өз анасын өзі атып өлтірген. Сол сияқты мәңгүрт чиновниктер Қазақстанның мемлекеттік тілі ҚАЗАҚ ТІЛІН, ұлттық әуен, күй, жыр, би, ою, өрнек, музей қысқасы қазақ мәдениетін құрайтын қандай киелі элемент бар, соның бәрін қиратып, күйретіп жойғысы кеп тұрады. Қазақ мектебі ашылады десе мәңгүрттердің аза бойы қаза болады. Ертең қазақ тілді, мәңгүрт емес, кеудесі кең, мәдени тамыры терең, рухани танымы үлкен мықты қазақтар көбейсе біз бишара сұраусыз далада қаламыз деп өлердей қорқады. Сол үшін де өзі сияқты мәңгүрттерді мың-мыңдап көбейтіп шығаруға аса мүдделі. Әйтпесе Ресейіңнің де, іштегі орыстың да біздің мектепте ісі де жоқ. Олардың өз елінде, өз ішінде проблемасы бастан асады. Соғысты сылтау қылып қазақша мектептерді тұншықтырып, ұлттық таным мен мәдениеттің, әдебиеттің өркендеуіне жол бермей отыр. Мәңгүрттіктен мезі болған алматылық батыр белсенділер опасыз шенеуніктермен тоқтаусыз шайқасып жатыр. Мәңгүртте билік бар, белсенділерде ақиқат бар. Елдегі сепаратистік менталитетті күшейтіп, мемлекеттің ішкі рухани потенциалын әлсірете түсетіндер баласын орыс мектебіне беретін ата-аналар. Осылай кете берсе бір күні елі мен жерінен айрылған қазақтар газалық бейбақтар сияқты маңдалада шаңғытып шұбырып жүретін болады. Алматылық күрескер қазақтарға алыстан болсын рухани қолдауды бір сәтке де үзбеу керек. Үзсең мәңгүрттер күш алып, арқаланып шыға келеді", – деп жазды Санжар Керімбай.