Баланың көру қабілеті нашарламауы үшін не істеу керек маман

БҚО санитариялық-эпидемиологиялық бақылау департаментінің жетекші маманы Эльмира Галямованың мәлім еткеніндей, осы орайда мектеп оқушыларын медициналық тексеруден өткізіп тұрудың мәні зор. 

Оның сөзіне қарағанда, Батыс Қазақстан облысында өткен жылы жүргізілген осындай тексерулер балалардың көру қабілеті мен сколиоз бұзылыстары жағдайларының азайғанын көрсетті. 2025 жылдың қорытындысы бойынша сколиоз 26,4, ал көз патологиясының көрсеткіші 2,6 пайызға төмендеген.

— Медициналық тексеру нәтижесінде 4 901 баладан түрлі патология анықталған, бұл — тексерілгендердің 4,2 пайызы. Анықталған аурулардың 70,6 пайызы көз патологиясы, 4,2 пайызы сколиоз, 5 пайызы өзге аурулардың үлесіне тиеді. Бұл оқушылар арасында көз бұзылысы әлі де жиі кездесетінін көрсетеді. Көптеген балалар жақсы көру қабілетімен дүниеге келгенімен, мектеп жасында көру бұзылыстарының саны айтарлықтай артады. Көбінесе миопия 7–12 жас аралығындағы балаларда анықталады, — дейді Э.Галямова.

Маманның айтуынша, көру қабілеті нашарлауының негізгі себептері — жақын қашықтықта жұмыс істеу кезіндегі көзге түсетін шамадан тыс жүктеме, көру бұзылыстарын дұрыс түзетпеу (дұрыс таңдалмаған көзілдірік немесе контакт линзалары). Сондай-ақ дұрыс тамақтанбау, яғни магний мен мырыш сияқты көру үшін маңызды дәрумендер мен микроэлементтердің жетіспеушілігі әсер етеді. Тұқым қуалаушылықтың да маңызы зор: ата-анасының бірінде немесе екеуінде миопия болса, баланың дұрыс көрмеу қаупі артады.
Тағы бір назар аударатын жайт, сколиоз — омыртқаның бүйірлік қисаюы, ол көбінесе баланың белсенді өсу кезеңінде дамиды.

Ауру біртіндеп өршиді және бастапқы кезеңдерінде байқалмауы мүмкін. Сондықтан баланың дене қалпына назар аудару маңызды: иықтың тең орналасуы, партада дұрыс отыруы, аяқтың еденге толық тірелуі. Алдын алу шараларына тұрақты дене белсенділігі (жүзу, гимнастика, қимыл-қозғалыс ойындары), қатты арқалығы және кең бауы бар рюкзак пайдалану, сондай-ақ жүйелі медициналық тексерулер жатады.

— Бала денсаулығы күн сайын қалыптасады. Сондықтан ата-аналардың қарапайым профилактикалық шараларды сақтауы көздің көруін және омыртқаның саулығын сақтауға көмектеседі. Тұрақты дене белсенділігі бұлшық еттерді нығайтып, дұрыс дене қалпының қалыптасуына ықпал етеді. Мектеп құралдарын дұрыс тасымалдау, жұмыс орнын дұрыс ұйымдастыру (жақсы жарықтандыру, дұрыс отыру, мониторға дейінгі 40–60 см қашықтық) көру мен омыртқаға түсетін жүктемені азайтады. Компьютер алдында отыру уақытын күніне екі сағатпен шектеп, үнемі үзіліс жасап отыру қажет. Сонымен қатар дәрумендер мен микроэлементтерге бай дұрыс тамақтану, тұрақты медициналық тексерулер және мектеп жасында дене қалпын бақылау профилактиканың маңызды бөлігі болып есептеледі, — деп қосты Э.Галямова.

Еске сала кетейік, бұдан бұрын Оралда қызылшамен ауырған балалардың барлығы екпе алмағанын жазған едік.