Баланың мінез құлқына байланысты ондаған жолаушы ұша алмай қалды

Кішкентай жолаушының қауіпсіздік белдігін тағудан бас тартуы ондаған адамның Торонтоға ұша алмай қалуына себеп болды. Porter Airlines ұшағы терминалға қайтарылып, кейін рейсті мүлдем тоқтатуға тура келді, деп хабарлайды Tengri Travel.

Не болды?

Toronto CityNews мәліметінше, оқиға Викториядан Торонтоға бет алған рейсте болған. Жолаушылардың бірі баланың орындықта отырудан және қауіпсіздік белдігін тағудан бас тартқанын айтты.

Оның сөзінше, бортсеріктер баланы тыныштандырып, орнына отырғызуға бірнеше рет әрекеттенген, бірақ нәтиже шықпаған.

"Шынымды айтсам, бұл тіл алмайтын бала бала деп ойламадым. Тәртіп бұзған ересек адам шығар деп топшылаған едім", - деді ол.

Жолаушының айтуынша, ұшақты Британдық Колумбиядағы Виктория халықаралық әуежайының терминалына қайтару туралы шешім қабылданып, ол жерде ата-анасы мен баласы рейстен түсірілді.

Washington Post Instagram парақшасында Porter Airlines әуекомпаниясы ата-ана мен экипаж мүшелерінің баланы орындыққа отырғызып, белдігін тағуға бірнеше мәрте тырысқанын растады. Жолаушылар ұшақтан түсірілгеннен кейін, олардың жүгін де түсіру қажет болды. Бұл рейстің кешігуіне әкеп соқты.

"Нәтижесінде, ұшақ Виктория әуежайының ұшу-қону жолағы жабылғанға дейін (түнгі 00:30-да жабылады) ұшып үлгермеді", - делінген жарияланымда.

Instagram-дағы бұл жазбаны көру

A post shared by The Washington Post (@washingtonpost)

Осыған байланысты қалған жолаушыларға ұшақтан түсуге тура келіп, рейс тоқтатылды. Кейін Porter әуекомпаниясы борттағы жолаушылардан кешірім сұрап, оларды келесі күні Торонтоға баратын рейске ауыстырғанын хабарлады.

Канададағы бұл оқиға баламен саяхаттау әуекомпания ережелеріне ерекше назар аударуды талап ететінін тағы бір мәрте еске салады. Балалар қай жастан бастап өз бетінше ұша алатыны, балаға билет сатып алу қажеттілігі және балалар тағамының қай түрін бортқа алуға болатыны туралы жазған болатынбыз.

Айта кетейік, жақында British Airways әуекомпаниясының Лондоннан Лас-Вегасқа бағытталған рейсіндегі жанжал видеоға түсіп қалған болатын. Кадрлардан екі жолаушы төбелесіп жатқанын және оларды стюардесса тоқтатпақ болғанын көруге болады.

Тағы оқыңыз: Malaysia Airlines ұшқышы чемодан ішіндегі заттар үшін өлім жазасына кесілуі мүмкін

Google News арқылы жаңалықтарымызды қадағалаңыз