Беларусь Литва шекарасы: күзден бері тұрған мыңнан астам жүк көлігі қозғалды

Беларусь Мемлекеттік кеден комитетінің төрағасы Владимир Орловский мәлім еткендей, 24 наурыздан бастап шекара арқылы өткізу қайта жанданғаннан кейін 1300-ге жуық жүк көлігі Беларусь-Литва және Беларусь-Польша бағыттары арқылы шыққан.

Тағы шамамен 100 көлік Литваға кіруді күтіп тұр. Беларусь аумағында 500-ден астам жүк көлігі әлі де қалған.

Оның айтуынша, литвалық тарап көліктерді қабылдауға асығар емес. Мысалы, Литвадағы «Мядининкай» өткізу бекетінің тәуліктік өткізу мүмкіндігі 500 көлікке дейін жеткенімен, іс жүзінде күніне орта есеппен 70-80 жүк көлігі ғана өтеді, кейде бұл көрсеткіш 140-қа дейін барады.

Салдарынан шекарада кезек сақталып отыр. Оның ішінде Беларусь аумағындағы арнайы тұрақтарда тұрған көліктер де бар.

Орловскийдің сөзінше, Литва билігі жүк көліктерін қайтарып жатқан тасымалдаушыларға айыппұл салумен қорқытып, оларды санкциялық талаптарды бұзды деп айыптауда.

Еске салсақ, Литва мен Беларусь арасындағы шекара мәселелері 2025 жылдың қазан айында басталған. Литва тарапы Беларусь аумағынан әуе арқылы темекі контрабандасы тасымалдануына байланысты шекараны жапқан. Бұған жауап ретінде Беларусь литвалық жүк көліктерінің қозғалысын шектеп, оларды тәулігіне 120 еуро төлеммен арнайы тұрақтарға қою талабын енгізген.

Айта кетейік, Беларусь пен Таиланд арасында тікелей әуе рейсі ашылды.