Беті ақсары тышқанға ұқсап, көзі сығырайған саясаткерден, блогерден сақ болыңыз, оның терісінде филлер болуы мүмкін

Financial Times жақында бет-әлпетті жасартуға байланысты қысқа материал жариялады. Aikyn.kz осы материалға сүйеніп бүгінде кең таралған косметикалық процедуралардың себебі мен салдарын талдайды.

Гиалурон қышқылының бет филлерлері – бүгінде жұлдыздар, саясаткерлер мен қарапайым адамдар арасында кең таралған косметикалық процедураға айналды. Әдетте оны бірден байқамайсыз. Бірақ жарық түсу бұрышы өзгерсе, бетте екі жылтыр шар секілді байқалады. Ал филлер тым көп енгізілсе көздің астына дейін ісініп кетеді.

Филлердің әсерінен адамның беті ақсары тышқанға ұқсап, көзі сығырайып тұрады. Соған қарамастан, көптеген танымал адамдар үшін бұл процедура пластикалық хирургия әлеміне жасаған алғашқы қадамы саналады.

Қазір біз пластикалық хирургияның алтын дәуірінде өмір сүріп жатқандаймыз.Бет хирургтары өз ісінің шеберіне айналды. Қоғам да мәңгі 35 жастағы бет идеалына табына бастады. Бүгінде орта деңгейлі бет пластикасы дәрігерлері де адамды айтарлықтай «жасартатын» керемет технологияларды меңгерген.

Айналаңызды мұқият шолып өтсеңіз, қоғамға танымал адамдардың арасында сема-глутидтер (арықтататын дәрі) қабылдайтын, түрлі пластикалық емшара жасатқан тұлғаларды байқай аласыз. Артық салмақтан арыла бастаған адамның терісі салбырайтын мәселесі туады. Бұдан кейін адамдар денесін 20-дағы жастың терісіндей тегіс, серпімді еткісі келеді.

Осылайша бет тарту, ботокс, блефаропластика сияқты операциялар сәнге, әлеуметтік желіге, тіпті күнделікті өмірге еніп кетуде. Бірақ шынайылықты, табиғилықты жасыру мүмкін емес. Блефаропластиканы (көз қабағын тарту) алыстағы 1818 жылы Карл Фердинанд фон Грефе ойлап тапқан. Қазір ол әлеуметтік желідегі жастар арасында трендке айналды. Ұлыбританияда бұндай пластикалық өзгерту кеудені үлкейту мен кішірейтуден кейінгі үшінші ең танымал операция екен.

Контурлы пластикадан (филлер) кейін адам «жасармайды», қатып қалған маңдайы мен таңғалған көздері бірден байқалады. Фото centralfloridaeye.com сайтынан алынды

Көп адам мұндай операциядан кейін шын мәнінде «жасарып» кетпейді. Олардың мұздай қимылсыз маңдайы мен таңғалған көздері ботокстың әсерінен екенін бірден байқатады.

Контурлы пластиканың (филлер) белгілері де бірден көрінеді. Адамның еріні шамадан тыс томпайып, ісініп тұрады. Филлер (қазақша толтырғыш) – әжімдерді толтыру, еріннің көлемін ұлғайту, бет пішінін түзету немесе тыртықтарды кетіру үшін тері астына енгізілетін гель тәрізді зат. Контурлы пластика операциясыз бет-әлпетті жақсартуға мүмкіндік береді.

2019 жылы жасөспірімдер мен 20 жастағы Vice UK Snapchat-тың аудиториясы арасында жүргізілген сауалнамада қатысушылардың жартысынан астамы мұндай процедураларды «шаш қию немесе маникюр секілді қалыпты іс» деп санаған.

Vice мәліметтері аса дәл болмауы мүмкін, бірақ ол бір өзгерісті нақты көрсетеді.  Қоғам пластикалық операцияға төзімді және тіпті оны қалыпты құбылыс ретінде қабылдай бастады. Респонденттердің 66%-ы өз келбетін өзгерткісі келетінін айтқан. Британдық эстетикалық хирургтар қауымдастығы әйелдер мен ерлер арасында бет тарту операцияларының өскенін тіркеген: әйелдерде 8%-ға, ерлерде 26%-ға артқан.

Бұл үрдістерді алаңдатарлық деп санауға болады. Қазіргі кезде 30-40 жастағы инфлюенсерлердің терісінің «сәл ғана салбырағанына» шағымданып, бетін тартқызған мысалдар бар. Әлеуметтік желілерде «40 жасымда бетімді тартқыздым, оған еш өкінбеймін» деген постар көбейген.Мәңгі жас көрінуге деген жалған мақсат жасанды интеллект пен цифрлық сұлулық мәдениетінің ықпалымен күшеюде. Пластикалық операция жасамаған адам қоғамның алдында «кәрі» болып көріну қаупіне тап болуда. Бұның бәрін Жаратылыс заңына қарсы, «виртуалды бетке» айналу процесі деп сипаттауға болады.

Тартылған, филлермен толтырылған беттер ұрпақтар арасындағы табиғи айырмашылықты жойып барады. Әжелер немерелерімен, аналар қыздарымен бірдей көрінгісі келеді. Батыстық мәдениеттің өзі бұның психологиялық тұрғыдан бұрмалану екенін айтып, дабыл қағуда. Жақында Ким Кардашьян жаңа қысқа шаш үлгісімен көпшілік алдына шыққанда оны анасымен шатастырғанына күлесіз бе, аяйсыз ба?

Бүгінгі әлемнің сұлулық пен жастыққа тәуелділігін, әлеуметтік желілер мен ЖИ фильтрлерінің әсерінен табиғи келбеттің жойылуын әркім әрқалай қабылдайды. Пластикалық хирургия сән мен сұлулықтың айнымас бөлігіне айналғанымен, ол адамды табиғилықтан алыстатып, тұлғалық ерекшелігін жояды.

Атақты ағылшын Редьярд Киплингтің: «Шығыс – Шығыс болып, Батыс – Батыс болып қала береді. Көк пен Жер ұлы Жаратушы сотының алдына келгенше, олар ешқашан кездеспейді», – деген сәуегейлігі мағынасын әлі жоғалтқан жоқ.

Қазақтың сұлулық ұғымы – табиғилық пен үйлесімге, рухани тазалыққа негізделген. Ал бет-әлпетті жасанды жолмен өзгерту рухани тамырымыздан алыстатады. Бұндай үрдістер өзіндік мәдени келбетіміз бен табиғи сұлулық дәстүріне қайшы келетінін есте сақтайық.

Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.