Бибігүл Жексенбай этносаралық келісім және БАҚ этикасы туралы пікір білдірді

Алматыда өткен жиында ҚР Парламенті Сенатының депутаты Бибігүл Жексенбай этносаралық келісімді нығайтуда бұқаралық ақпарат құралдарының рөлін атап өтіп, журналистік этиканың қоғамдағы татулық пен ұлттық қауіпсіздік үшін маңызын айтты. Іс-шара барысында Бас редакторлар клубы мен ҚХА журналистер клубы арасында өзара әріптестік туралы Меморандумға қол қойылды, деп хабарлайды Egemen.kz.

Фото:.facebook.com/BibigulZheksenbay

Бибігүл Жексенбайдың айтуынша, көпэтносты Қазақстан үшін БАҚ-тың рөлі айрықша. Әрбір сөз бен жарияланым қоғамдағы сенім мен татулыққа әсер етеді.

«Сондықтан журналистің кәсіби этикасы — бұл тек мамандық талабы емес, ұлттық қауіпсіздік пен қоғамдық келісімнің кепілі. Көптеген елдерде этносаралық тақырыптарды жариялауда нақты этикалық нормалар бар. Мысалы, Ұлыбританияда Ofcom өшпенділік тіліне жол бермейді. Канадада журналист осы бағыттағы «нәзік» тақырыптарды этностық топтармен кеңесіп барып жазады. Еуропа Кеңесінің хартиясында: «Журналист қоғамды бөлуге емес, түсіністікке қызмет етуі тиіс»,  делінген. Бұл — жауапты журналистиканың ортақ қағидаты», деді депутат.

Оның сөзінше, елімізде 130-дан астам этнос өмір сүреді, сондықтан сөз мәдениеті – келісім мәдениетімен тығыз байланысты.

Жиында Бас редакторлар клубы мен Қазақстан халқы Ассамблеясы журналистер клубы БАҚ-та этносаралық және діни мәселелерді жариялау жөнінде Этикалық кодекс қабылдау, арнайы медиа кеңесін құру және «Толеранттылық және медиаэтика» пәнін журналистика мамандықтарына енгізу мәселелерін талқылады.

«Бұл шаралар сөз бостандығын шектеу емес — сенім мен кәсібилікті арттыру тетігі. Халқымыз «Бірлік бар жерде – тірлік бар» дейді. Ақпараттық дәуірде бұл қағида бұрынғыдан да өзекті. Біздің міндетіміз — сөз арқылы келісімді, түсіністікті және өзара құрметті нығайту», деді Бибігүл Жексенбай.