Бишімбаев ісінен кейін танымал болған Айжан Аймағанова прокуратурадан кетті

Айжан Аймағанова прокуратурадан кетті. Бұл туралы ол Instagram-дағы парақшасында жариялады, - деп хабарлайды Tengrinews.kz.

Айжан Аймағанова бұл туралы стористе бөлісті. Аймағанованың есімі партиялардың бірінен депутаттыққа кандидаттар тізімінде пайда болды.

"Кейінгі күндері әлеуметтік желілерде менің партия атынан депутаттыққа кандидат ретінде ұсынылғаным туралы ақпарат қызу талқыланып жатыр. Бұл жағдайға жеке өзім пікір білдіруді жөн көрдім. Көп жыл бойы прокуратура органдарында қызмет еттім. Мен үшін бұл әрқашан заңға, мемлекетке қызмет ету және азаматтардың құқықтарын қорғау болды. Кандидат болып ұсынылуыма байланысты прокуратурадан жұмыстан шықтым. Бұл – заң талабы, мен оны толық орындадым", - деп жазды ол.

Сонымен қатар, ол бұл шешімді саналы түрде қабылдағанын айтып, қолдау көрсеткендер мен жағдайға бейжай қарамағандарға алғысын білдірді.

"Кәсіби тәжірибем мен білімім заң шығару қызметінде, сондай-ақ, азаматтарымызды мазалайтын мәселелерді шешуде пайдалы болатынына сенімдімін. Баршаңызға қолдауларыңыз, сұрақтарыңыз бен назар аударғандарыңыз үшін алғыс айтамын. Мен үшін бұл маңызды. Алда атқарылатын жұмыс көп, мен ашық диалогқа дайынмын", - деп түйіндеді ол.

Еске салайық, 2024 жылғы мамырда Tengrinews.kz редакциясы Салтанат Нүкенованың өліміне қатысты сот ісінен кейін қазақстандықтарға танымал болған Айжан Аймағановамен сұхбаттасқан болатын. Ол өзінің балалық шағы, мансап жолы және даулы процесс туралы айтып берген еді.

2023 жылы 9 қарашаға қараған түні Салтанат BAU мейрамханасында бұрынғы ұлттық экономика министрі Қуандық Бишімбаевтың соққыға жығуынан кейін көз жұмды. Ол соққыға жығылып, содан кейін бірнеше сағат бойы көмексіз қалдырған, салдарынан әйел қайтыс болды.

2024 жылғы 13 мамырда Астанада сот процесі аяқталды. Сот Қуандық Бишімбаевты жұбайын қинағаны және өлтіргені үшін кінәлі деп таныды. Ол 24 жылға бас бостандығынан айырылды.

Бұл Қазақстан тарихындағы ең резонанс тудырған процестердің бірі болды, оны бүкіл әлем бойынша миллиондаған адам бақылап отырды. Әлеуметтік желілерде Салтанатты қолдау акциялары өтіп, отбасылық-тұрмыстық зорлық-зомбылық мәселелері жаппай талқылана бастады. Құқық қорғау ұйымдары, заңгерлер мен белсенділер заңнамаға өзгерістер енгізуді талап ете бастады.

2024 жылдың басында билік реформалар бойынша жұмысқа кірісті. Президент Қасым-Жомарт Тоқаев тұрмыстық зорлық-зомбылық үшін жауапкершілікті күшейтуге бағытталған бірқатар заңға қол қойды. Бұл бастамалар халық арасында бейресми түрде "Салтанат заңы" деп аталды.

2024 жылғы 16 маусымда әйелдердің құқықтарын қамтамасыз ету және балалардың қауіпсіздігі мәселелері бойынша заң күшіне енді.