Біз ҰҚҚКБ данбыз алматылықты ұрлап кетіп, 3 миллион теңге беруге мәжбүрлеген

Алматыда төрт ер адам өздерін ұйымдасқан қылмысқа қарсы күрес басқармасының (ҰҚҚКБ) қызметкерлеріміз деп таныстырып, жергілікті тұрғынды ұрлап кеткен және қарумен қорқытып, ақша талап еткен. Жәбірленушінің туысы қаскөйлерге 3 миллион теңге аударған, деп хабарлайды Tengrinews.kz Polisia.kz сайтына сілтеме жасап.

Тапаншамен қорқытып, қала сыртына алып шыққан

ІІМ мәліметінше, 10 тамызда бір топ адам алдын ала сөз байласып, ер адамның соңына түскен. Өздерін ҰҚҚКБ қызметкері ретінде таныстырған олар оны тапаншамен қорқытып, көлікке отыруға мәжбүрлеген және Алматы қаласының сыртына алып шыққан.

Содан кейін қаскөйлер жәбірленушіден ақша талап еткен. Олар қысым көрсету арқылы ер адамды туысына қоңырау шалдырып, өздері көрсеткен нөмірге қаражат аударуын сұрауға мәжбүрлеген.

Әйел 3 миллион теңге аударған.

Полиция қызметкерлері төрт күдіктіні қолға түсірді. ІІМ дерегінше, олардың барлығы бұрын сотталған, ал ұсталғандардың бірі кісі өлтіргені үшін жазасын өтеп келген.

Төртеуі де уақытша ұстау изоляторына қамалды.

Тінту кезінде полицейлер екі мылтық, карабин, газ тапаншасы мен оқ-дәрілерді тауып, тәркіледі.

Тергеу жалғасып жатыр.

Осыған ұқсас қылмыстық іс Ақтөбе облысында да қозғалды. Онда өзін ҰҚҚКБ қызметкерімін деп таныстырған өңірдің бұрын сотталған тұрғыны ұсталды. ІІМ мәліметінше, ол бопсалау және психологиялық қысым көрсету арқылы жергілікті тұрғындардан ақша бопсалаған.

ІІМ азаматтарды қырағы болуға және өздерін құқық қорғау органдарының қызметкеріміз деп таныстырған адамдардың қоқан-лоқысына берілмеуге шақырды. Қазақстандықтарға мұндай жағдайлар туындаған кезде дереу полицияға хабарласу ұсынылады.

Бізді Google-дың негізгі дереккөздер тізіміне қосыңыз